Reseıdiń "Golos. Detı" baıqaýyna irikteý kezinde ádilqazylardy túgel aýzyna qaratqan qazaqstandyq Erjan Maksım ózi týraly aıtyp berdi, dep jazady Qamshy.kz aqparat agenttigi sputniknews.kz saıtynyń deregine súıenip.

Jobaǵa bergen suhbatynda atap ótkendeı, "Golos. Detı" shoýyna qatysýdy kishkentaıynan armandapty. Biraq ata-anasy "biraz tájirıbe jınaqtap alsyn" dep bıyl ǵana jobaǵa qatysýǵa ótinish bergen eken.

"Jetekshiler buryla bastaǵanda, tańǵalǵan joqpyn, biraq bári burylǵan kezde, armanymnyń oryndalǵanyn sezdim", - deıdi Erjan.

Erjannyń anasy Gúlmıra Álibektiń aıtýynsha, búkil otbasy ónerge jaqyn jandar – Erjannyń ata-babasy, ata-anasy, aǵa-ápkeleri de án aıtady.

"Úsh jasynda Erjannyń erekshe daryn ıesi ekenin túsindik. Kúıeýimniń qyryq jasynda eki án oryndady. Dostarymyz ben týystarymyz tańǵalyp, "vokalǵa berińder" dedi. Biz Oral qalasyndaǵy jastar mádenıet úıiniń vokal synybyna berdik", - deıdi Gúlmıra.

Keýdesin maqtanysh sezimi kernegen ana ulynyń mýzykaǵa degen mahabbaty qursaǵynda jatqan kezinen bastalǵanyn eske aldy.

"Aıaǵym aýyr kezde ylǵı mýzyka tyńdap júretinmin. Sol áser etken sıaqty. Mýzyka tyńdasam boldy, balam da qulaq túrgendeı qozǵalmaı qalatyn", - deıdi Gúlmıra.

Erjan bos ýaqytynda rolık, kónkı teýip, bokspen aınalysqandy jaqsy kóredi. Sondaı-aq ákesimen birge monshaǵa baryp, keıde anasy ekeýi tort pisiredi eken. Otbasynyń eń súıikti táttisi - "Výpı paı" torty.

Mýzykalyq aspaptar ishinde Erjan fortepıanoda oınaıdy, "Golos. Detı" jobasynan keıin dombyrany qolǵa almaq. "Ata-babalarym dombyrada oınaǵandyqtan, men de úırenýim kerek", – deıdi jas ánshi. Jasóspirim Máskeýde balalaıka tartyp úırengenin de aıtty.

Erjanǵa, ásirese Andrea Bochellıdiń ánderi qatty unaıdy.

"Eseıgen kezde Dımash Qudaıbergenge uqsaǵym keledi. Dımash Qazaqstandy búkil álemge tanytyp júr. Jolyn qýsam deımin", - dedi ol.

Biraq Erjannyń aıtýynsha, búkil álemdi baǵyndyrǵan juldyz bolý úshin bir ǵana daýys jetkiliksiz.

"Sahnaǵa shyqqanda aıtqan ánińdi halyqtyń júregine jetkizýge tıissiń", - deıdi Erjan.

"Armanym – búkil álemge tanymal ánshi bolyp, Rımde Kolızeı sahnasynda án shyrqaý", - dep oıyn aıaqtady jas ánshi.

Usynǵan: Nazerke Labıhan