Áıel adam qolynda qansha aqshasy bolsa da, dúken, bazar ataýlyny saǵattap aralap júre berýge bar. Áıelder qaýymy, biz  sondaımyz, á?  Tizimdep barǵan on zatqa taǵy qosymsha on zat satyp alyp, qaıtar jolǵa jetetindeı ǵana jolpul qaldyryp, qalǵanynyń báriniń basyna sý quıyp bir-aq shyǵamyz bazardan, dúkennen.

Alaıda, pendeshilikke salynyp satýshy da, satyp alýshy da keıde ańǵaryp, keıde ańǵarmaı ótirik aıtyp qoıatynymyz bar. Tipti ol ótirikterdiń jattandy bolyp ketkeni sonsha, ótirik emes,  aýyzeki tildegi qalypty tirkester sıaqty. Sonymen, satýshy men satyp alýshy arasyndaǵy kúndelikti estıtin, biraq elemeıtin ótirikter.

1-ótirik

Men: - Myna aıaqkıim shynymen de sapaly ma? Uzaqqa shydaı ma? Áıtpese, jylyna eki ret aıaq kıim alyp júrmin de (ótirik, bir aıaqkıimdi óıtip-búıtip eki jyl kıgenmin).

Satýshy: - Árıne! Óte sapaly! Muny ózim de eki jyldan kóp kıdim (ótirik, satýshy budan da arzanyn menen de uzaq kıip júr).

2-ótirik                                                               

Men: - Biraz túsirseńizshi? Anaý-mynaý usaq -túıekti  alyp edim, basqa aqsham bolmaı tur... (ótirik, aldymen aıaqkıim alyp alaıyn, sosyn qalǵanyna basqa kerek-jaraq alamyn dep josparlaǵanmyn).

Satýshy: - Oı, joǵa, túsire almaımyn. Ózi ústine 200-300 teńge ǵana qosyp turmyn (ótirik, birge-bir qospasa, odan az qospaıdy).

3-ótirik

Men: - Bir jasar ulyma, úsh jasar qyzyma sıar ma eken? Oıyn balasy tez tozdyryp tastaıtyn shyǵar. Bir aı buryn sonsha aqshaǵa alǵanymdy tozdyryp tastady (ótirik, áli kıip júr, tipti inisi ápkesiniń eki jyl kıgenin úıge kıip júr).

Satýshy: - Álbette! Men de balama týra osyny alǵanmyn, áli kıip júr (ótirik, týra osyny almaǵany aıdan anyq, ózi 40-45 jas shamasynda bolsa, balasy meniń balammen jasty emestigi anyq).

4-ótirik

Men: -  Sizdiń taýaryńyz arzan ba negizi? Qazir basqa jerden arzan taýyp alsam, alyp kelemin qaıtadan (ótirik, ákelmeımiz ǵoı báribir, ishteı burqyldap qoıa salamyz).

Satýshy: - Iá, meniki eń arzan! Arzanyn tapsańyz, alyp kelińiz, birden qaıtaryp beremin (ótirik, qaıtarǵan kúnniń ózinde ólerdegi sózin aıtyp beredi, ári sózsiz, basqa jerde arzany bar).

5-ótirik

Men: - Qaı kespe jaqsy? Qaı maı dámdi? Súttiń qaısysy qoıý? Shaıdyń qaısysy jaqsy shyǵady? Ótkende sonsha aqshaǵa alǵanymdy eshkim ishpeı, aqyry, qury tastadyq ıtke (ótirik, onsha emes bolsa da aqshaǵa keldi ǵoı dep, úıdegilerge zorlap ishkizip, jegizdik).

Satýshy: - Mynaý jaqsy kespe... Mynaý jaqsy maı... Mynaý jaqsy sút... Erimeıdi, ezilmeıdi, jaqsy shyǵady... ózimiz osyny jeımiz, ishemiz (ótirik, as mázirleri týra bizdiki sıaqty emes anyq, ári azyq-túlik satýshylar kóbinese jarylǵan sút, myjylǵan maı, paketi tesilgen kespe, dúkenderindegi merzimi bitip bara jatqan azyq-túlikterin jeıdi,  bilemiz ǵoı).  

6-ótirik

Men: - Myna azyq-túlikterdi jańadan ákeldińiz be? Keshe bir jerden jańadan ákeldik degen soń ala salyp em, kógergen, shirik bolyp shyqty, únemi sóıtedi (ótirik, mundaı sát sırek, únemi olaı bola bermeıdi).

Satýshy: - Iá, árıne. Mynany keshe, al mynany baǵana ǵana alyp keldik. Kúmánińiz bolmasyn, baqshadan terip aldyq (ótirik, kókónisterdiń turǵanyna eki kún, azyq-túlikterge bir apta shamalas bolǵan, keıbireýin tipti shańyn súrtip sóreniń eń artynan aldyńǵy jaǵyna shyǵaryp qoıǵan búgin ǵana).

7-ótirik

Men: - Myna zat orıgınal ma? Qytaıdyń da qytaıy bolady ǵoı. Ótkende orıgınal dep sonsha aqshaǵa alǵanym, ótirik bolyp shyqty. Satýshynyń sózine senip qalyp em, uryndym (ótirik, orıgınal emestigin bile tura arzan aqshaǵa alǵanbyz, jáı sóz).  

Satýshy: - Orıgınal, árıne! Ózim baryp alyp keldim. Orıgınal ma, emes pe, birden tanımyn ǵoı. Anaý-mynaý ótirik nárse satpaımyn (ótirik, tipti túpnusqanyń jalǵan túrinen aıyrmasy qandaı ekenin de bilmeıdi).

Sizder de osy ótirikti jıi aıtasyzdar, jıi estısizder ǵoı, ıá? Tek baıqamaı júrgen shyǵarsyzdar, á? Sonda kim-kimdi aldap júr?

 Maqpal Sembaı