Qamshy.kz aqparat agenttigi Almatydaǵy kaizen ortalyǵynyń jumysy jaıly kóp serıaly maqalalar berýdi qolǵa aldy. Atalmysh ortalyqtyń basty mısıasy – kaıdzen túsiniginiń keńirek taralyp, qoldanysqa enýine septik etý.

Japonıalyq júıemen jumys jasap, tasyn órge domalatyp otyrǵan óndiris oryndarynyń biri – «Almaty jeldetkish zaýyty» ekenin estigeli beri kózben kórip, qolmen ustaýǵa degen qulshynys artty.

Kaıdzen júıesine degen qyzyǵýshylyq Almaty mańyndaǵy Qoıanqusqa qaraı qustaı ushyrǵan-dy. Taksıletip jetip, eńseli kók qaqpadan ótken kezde-aq birizdi tártiptiń, jolǵa qoıylǵan júıeniń ıisi keledi.

Aldymyzdan kútip alǵan zaýyttyń satý bóliminiń basshysy Ismaılov Berik ishke bastady. Muntazdaı taza keńse, kireberistegi mańyzdy qujattar men alǵys hattardyń, sertıfıkattardyń kórinisi júıeniń nátıjeliligin taǵy bir dáleldep úlgerdi.

Bizdiń maqsat – óndiristegi kaıdzen júıesiniń qanshalyqty jumys jasaıtynyn, jumys úderisin kórý, jańashyldyqpen tanysý.

Zaýyt basshysy Nurǵalı Qanatulymen júzdesip, az-kem áńgimege kezek berdik. «Almaty jeldetkish zaýyty» JSHS basshysy naryq jaıymen, jalpy kaıdzen júıesiniń tártipterimen, eksport máselesimen, qyzmetkerlerdi baǵalaý júıesimen tanystyrdy.

Kózge túsken taǵy bir erekshelik – zaýyt basshysynyń aldyndaǵy jumys ústelinde jeldetkish týraly jýrnaldar, broshbralar, ásirese jeldetkishtiń birneshe bólshekteriniń jatýy. Bul isker adamnyń negizgi qasıetteriniń biri bolýy shart dep bir túıdik.

Joǵaryda aıtylǵan máseleler boıynsha sál keıinirek saıt betinde suhbat jaryq kóredi.

Zaýytty tanystyrýǵa satý bóliminiń menedjeri Renat Samadjıev bastady. Kishigirim dálizden ótkennen keıin-aq atshaptyrym óndiris oshaǵy kórindi. İshinde sapyrylysqan qımyl joq. Bir-bir núktede óz isterine shuqshıǵan kaskaly qyzmetkerler.

Ári qaraı árbir bólimdi jeke-jeke tanystyralyq

Asqana jaıy

As ishiletin oryn keń ornalasqan. Túski as ýaqytynda zaýyt qyzmetkerlerine arnaıy ýaqyt beriledi. Belgilengen ýaqyt ishinde jumysshylar 50 paıyzdyq jeńildikpen qalaǵan taǵamymen aýqattanýyna múmkindik bar.

Sonymen qatar, táýligine óndiriste jumys jasaıtyn barsha qyzmetkerlerge tegin aıran beriledi. Bul úrdis azamattardyń metaldyń, toktyń, boıaýdyvń aınalasynda eńbek etetinin eskerile otyryp qalyptasqan.

Kıim aýystyrý bólmesi

Bul bólmede qabyrǵa jaǵalaı arnaıy shkaftar qoıylǵan. Jáne qajettilik týyndaǵan ýaqytta olar las kıimderin jańasyna aýystyra alady. Aýystyrý jıiligi 3 kún. Qyzmetkerdiń tegi jazylǵan arnaıy uıashyqqa kir forma tastalyp, jańasyna aýystyrylady.

Bul – mekemeniń qyzmetkerge degen qurmeti.

Zaýyttaǵy úderister

Óndiris oshaǵyna kireberiste turyp kaska kıip aldyq. Renat ári qaraı tanystyra bastady.

Sary syzyqtar syry

Sharshy tárizdes ornalasqan úlken óndiris oshaǵynyń tas edeninde ártúrli baǵyttarǵa qaraı sozylǵan sary syzyqtar qyzyǵýshylyǵymyzdy qytyqtady.

Kózimizden suraq baıqaǵan bolý kerek, Renat ile-shala túsindire bastady. Aıtalyq, sary syzyqtardyń ortasy ǵana kez-kelgen adamnyń júrýine ruqsat beredi. Sary syzyqtan ońǵa nemese solǵa qaraı shyǵý úshin qaýipsizdikti qamtamasyz etetin arnaıy kıimder men kózildirikti, kaskany kıý kerek.

Sary syzyqtan kedergisiz ótý «baqyty» sol aımaqtyń mamandaryna ǵana buıyrǵan.

Qyzyl syzyqtar qupıasy

Ekinshi kózge túsken erekshelik – árbir jumys ústeliniń, tehnıkalardyń oryny qyzyl syzyqtarmen belgilengen. Odan tysqary jyljýǵa ruqsat joq. Sondaı-aq, ár jumys ústeli ár mamanǵa tıesili. Mysaly, dánekerleýshi bólek orynda, operator bólek orynda degendeı.

Árbir jumysshynyń aldyndaǵy qabyrǵada nemese onyń jumys ústelinde áreketterdiń sýret arqyly, jazý arqyly kórsetilgen standarttary, tártipteri, talaptary tur. Artyq-kem jasaýdyń qajeti shamaly. Kózińmen qaǵıdalardy bir sholyp ót te, jumysyńdy jalǵastyra ber.

5S qaǵıdasy

Oqyrmanǵa túsinikti bolý úshin kaıdzen júıesiniń «Almaty jeldetkish zaýytynyń» qoldanysynda bar 5S qaǵıdasy týraly sóz qozǵaı ketelik. Mysaldardy temir jonýshynyń taqtasynan keltireıik.

1S – «İrikte, kereksizinen aryl»

«Kereksizin qyzylmen belgile - laqtyr!

Qaldyrǵanyńdy tıimdi paıdalan!»

Asta-tók shyǵynǵa jol joq ekenin eskertedi.

2S – «Jumys orynyn jasa!»

«Joldas, ujymyńdy uıaltpa,

Orynyn belgilep, orynyna qoı!»

Bul tirkester qyzmetkerdiń esine birizdilikti, jınaqylyqty saqtaýdy salady.

3S – Jumys orynyńdy taza usta!»

«Basqalarǵa úlgi kórset isińmen,

Jumys orynyn taza usta, artyq qoqys túsirme!»

Aıta ketý kerek, zaýyt tártibi boıynsha árbir jumysshy óziniń belgilengen aımaqtaǵy jumys orynyn ýaqyt aıaqtalǵanda jınap qoıýy tıis.

4S – «Qalypqa keltir!»

«Jumys oryny – jáshik emes kereksizdi salatyn,

Tártip bolý kerek zatty ońaı taýyp alatyn».

Árbir quraldyń ataýy jazylǵan arnaıy oryny bar. Beı-bereket jınastyrýǵa jol joq.

5S - «Jetildir!»

«Temir jonýshy bolsań da, basqarýshy bolsań da, jumys orynyńdy jetildir!»

Bul óz qyzmetińe degen mahabbatyń bolsyn degendi meńzeıdi.

Shıkizattan ónimge deıin

1-qadam

«Almaty jeldetkish zaýytynyń» qyzmetkerleri kúnine 16 jeldetkish jasaıdy. Olar kólemi jaǵynan, atqaratyn fýnksıasy jaǵynan alýan túrli. Olar aldyn-ala berilgen tapsyrys boıynsha josparly túrde jasalady.

Eń aldymen, alúmını panelder qoımadan shyǵarylyp, Germanıadan jáne Qytaıdan ákelingen joný jáne lazerli kesý apparattaryna jóneltiledi. Nemistiń «Trumatic 500» qurylǵysy paneldi tegistep, oǵan ornyqty bolýy úshin kishkentaı kertikter salady.

Al «TruLaser 1030» qurylǵysy alúmını panelderdi qajetti formaǵa saı kesedi. Eń basty artyqshylyǵy – kesilgen oryndardyń tegis shyǵýy.

Qos apparat ta kompúter arqyly, arnaıy baǵdarlamalar kómegimen jumys jasaıdy. Qurylǵylar janynda operatorlar qadaǵalap turady.

2-qadam

Ár túrli bólshekter shań-tozańynan arylyp jýylady da, arnaıy boıaý apparatyna jetkiziledi. Boıalǵan bólshekter qurastyrý alańyna jetkiziledi. Sol jerde jeldetkishtiń jalpy pishini qalyptaspaq.

3-qadam

Ári qaraı kesilgen panelder qurastyrylyp, jeldetkishtiń syrtqy nobaıyn shyǵarady. Al onymen bir ýaqytta jeldetkishtiń qozǵaltqyshtary jınalyp jatady.

Odan ári syrtqy qalyp pen qozǵaltqysh biriktirilip, burandalarmen bekitiledi.

4-qadam

Qurastyrylǵan jeldetkishti arnaıy tekseris alańynda tokqa qosyp, synaqtan ótkizedi. Eger eshqandaı aqaý shyqpasa, baqylaýshy jaramdy dep tańba qoıady.

Tapsyrystar nomerlenip otyratyndyqtan, ónim qaptalǵan soń baqylaýshy onyń syrtyna tapsyrys nomerin jazady.

5-qadam

Tekserýden sátti ótken jeldetkishter qaptaý, oraý alańyna jiberiledi. Sol jerde ónimniń qaýipsizdigin qamtamasyz etetin zattar arqyly jeldetkish qaptalady. Sodan keıin astyna aǵash turǵy qoıylǵan daıyn ónim arnaıy orynǵa jetkiziledi.

Mine, osy jerden arnaıy nomerleri boıynsha tapsyrys berýshiler jeldetkishin alyp jónele bermek.

Qarapaıym qyzmetkerler Ulybrıtanıada

Kaıdzen júıesiniń bir talaby – sheksiz damý úderisinde bolý. Osy talapty oryndaý maqsatynda «Almaty jeldetkish zaýytynyń» dánekerleýshi mamandary Ulybrıtanıada sheberlikterin shyńdap qaıtqan.

Olar qazir sheteldikterdiń úzdik tájirıbelerin ózderiniń jumys isteý tásilderine kiriktirip, eńbek ónimdiligin arttyrǵan.

Budan bólek, barlyq mamandarǵa ózderiniń baǵyty boıynsha kvalıfıkasıany arttyrý kýrstary, trenıńteri ótkizilip turady.

Qyzmetker usynysy úshin aqsha alady

Zaýytta qyzmetkerlermen keri baılanys taqtasy bar. Jumys barysyndaǵy keıbir úderisterdi jeńildetý úshin qyzmetkerden tikeleı basshylyqqa usynystar jasalynady.

Tıimdi usynys jasaǵan qyzmetkerge basshylyq tarapynan bonýs retinde qarajat esepteledi.

Jumys jasa da, sheksiz jalaqy al

Kaıdzen júıesi qyzmetker múmkinshiligin shektemeıdi. Qyzmetker barynsha ónimdi jumys jasasa, negizgi jalaqysyna qosymsha retinde sonsha aqsha tabady.

Bul úrdis «Almaty jeldetkish zaýytynda» da jolǵa qoıylǵan. Zaýyttyń qarapaıym jumysshysy men bas dırektory aralas-quralas júrgen jerde berekeniń bolary anyq.

Kaıdzen kómegimen kásibin 40 paıyzǵa ulǵaıtqan Nurǵalı Qanatulymen suhbat jaqyn arada saıt betinen jaryq kóredi. «Almaty jeldetkish zaýytynyń» qyzmetkerlerdi baǵalaý, ónimdilikti arttyrý, jumysshylarmen til tabysý syndy taqyryptar suhbatta qaýzalady.