Qyrǵyz elinde shý shyqty - egiz balany dúnıege ákelgen otbasy prokýratýraǵa shaǵymdandy dep habarlaıdy Qamshy.kz aqparat agenttigi sputniknews.kz  saıtyna silteme jasap.

Qyrǵyzstanda 24 jastaǵy Gúlzına Ábdimájıtova Osh oblystyq perzenthanasynda egiz balany aman-esen dúnıege ákeldi. Alaıda ekiqabat kezinde últradybystyq zertteý onyń úshem týatynyn kórsetken.

Gúlzınanyń 26 jastaǵy kúıeýi Yntymaq Bazarbaı Osh oblystyq prokýratýrasyna dárigerlerdiń ústinen shaǵym túsirgen.

Otbasy ota kezinde birnárse bolýy múmkin, ony dárigerler jasyryp otyr dep kúmándanady.

ÝDZ boıynsha úshem bolýy tıis

Ekiqabat áıelge 9 sáýir kúni kesar tiligi jasalǵan. Otadan soń óz-ózine kelgen áıeldiń qolyna dárigerler eki qyzdy ustatyp, egiz týdyń dep quttyqtaǵan.

2018 jyldyń qyrkúıeginde júktiliktiń eki aılyq kezinde Gúlzına Djalal-Abadta ÝDZ-ge túsedi. Zertteý onyń jatyrynda úsh embrıon baryn kórsetken.

Odan soń 2 sáýirde aýrýyna baılanysty ekiqabat kelinshek Osh oblystyq perzenthanasyna jatqyzylyp, ol arada da ÝDZ-ge túsedi. Ol kezde de úshem kútip júrgenin dárigerler oǵan jetkizgen.

"9 sáýirde túnde tolǵaǵym bastaldy. Dárigerler bir balanyń kóldeneń jatyp alǵanyn aıtyp, kesar tiligin jasaıtynyn aıtty. Men ózimniń týa alatynyma sengenmin. Biraq dárigerlerdiń sózin qup kórip, sońynda otaǵa kelistim", - deıdi Gúlzına.

Kelinshek bala týǵan kezinde enesin qasyna almaqshy bolyp josparlaǵan eken. Alaıda ota bastalǵanda dárigerler áıeldi ishke kirgizbeı qoıǵan.

"Maǵan narkoz berdi. Sodan eki qyzymdy týǵan soń talyqsyp kettim. Odan soń ne bolǵanyn bilmeımin. Al esimdi jıǵanda qolyma eki qyzymdy berdi. Men ne isterimdi bilmeı, sasyp qaldym", - deıdi jas ana.

Egiz qyz týǵan anany 16 sáýirde perzenthanadan shyǵarady.

Úshinshi bala qaıda ketti – dárigerlerdiń pikiri

Perzenthananyń bas dárigeri Gúlbara Kenjebaeva jatyrdaǵy uryqtyń o basta ekeý bolǵan dep sanaıdy. Al "úshinshi" bala ÝDZ-de qate kórsetilgen. İshte eki bala bolǵandyqtan durys kórinbeýi múmkin deıdi ol. 

"Men ol áıeldi bosandyrǵan joqpyn. Meniń biletinim, eki qyzdy aman-esen dúnıege ákelgen. Bireýiniń salmaǵy 2 keli 520 gram, ekinshisiniki – 2 keli 440 gram.  Negizi, ÝDZ jatyrdaǵy uryq sanyn júktiliktiń 12 aptasyna deıin anyq kórsetedi.  Al Ábdimájıtova apparatqa kesh túsken, júktiliginiń 18 aptasynan soń. Mundaı jaǵdaıda ÝDZ-diń shatasýy ábden múmkin ", - dedi Kenjebaeva.

Bas dáriger ota kezinde áıeldiń jatyrynda úshinshi balanyń bolmaǵanyn 9 medısına qyzmetkeri rastap bere alatynyn aıtady.

"Áıeldiń egiz qyz týǵanyn rastap beretin kýágerlerimiz de bar. Kesar tiligi ádisimen ota jasalǵanda eki akýsher-gınekolog, úsh akýsher, eki anestezıolog, medbıke, sanıtar qatysady, ıaǵnı jalpy sany  9 adam", - deıdi Kenjebaeva.

Sondaı-aq ol otaǵa áıeldiń enesin nege kirgizbegenin de túsindirdi.

"Tártip boıynsha ota jasalatyn zalǵa bógde adamdar kirgizilmeıdi. Eger ol ózi bosanǵan bolsa, onda oǵan eshkim kedergi bolmas edi", - deıdi bas dáriger.

Endi dárigerler ishki tekseris júrgizip jatyr. Olar bes ÝDZ nátıjesi boıynsha da nege bes bala kórsetilgenin anyqtamaq.

Usynǵan: Maqpal Sembaı