5 tamyzda Almaty oblysy Panfılov aýdany Taldy aýyldyq okrýginiń aýmaǵyndaǵy taýly jerlerde dala órtin sóndirý kezinde 3 adam qaza tapty Qamshy.kz aqparat agenttigi QR İİM baspasóz qyzmetine silteme jasap. 

Onyń bireýi Jarkent orman sharýashylyǵy mekemesiniń qyzmetkeri, qalǵan ekeýi órtti óz kúshterimen sóndirýge tyrysqan jergilikti turǵyndar. Sonymen qatar, 7 adam túrli dárejedegi kúıik aldy, onyń ishinde 1 adam aıaǵyn syndyrdy. Zardap shekkender Lesnovka aýylyna tikushaqpen jetkizildi, olar odan ári Jarkent qalasynyń ortalyq aýdandyq aýrýhanasyna jatqyzylady.

Oqıǵa ornynda Almaty oblysynyń TJD men Polısıa departamentiniń jeke quramynan 59 adam, 13-ten astam arnaıy tehnıka, sondaı-aq Jarkent memlekettik orman mekemesiniń qyzmetkerleri jumys isteýde. 

Órt oshaǵyn sóndirýge órt sóndirýshiler jáne polısıa qyzmetkerlerimen birge jergilikti turǵyndar, sondaı-aq orman sharýashylyǵy qyzmetkerlerinen qurylǵan erikti órtke qarsy qurylymdar jumyldyryldy. 

Taýly jerdegi órtti sóndirý qıyndyq týǵyzýyna baılanysty sýaǵar qurylǵysy bar MI-8 tikushaǵy tartyldy. Jaqyn mańda sý alatyn aıdyn-kól bolmaǵandyqtan, áýe kemesi adamdardy tasymaldap, qorjyndy búrikkishterdi sýmen qamtamasyz etý úshin jumys istedi.

Qazirgi ýaqytta órtti sóndirý boıynsha jumystar jalǵasýda. Órt oshaqtaryn oqshaýlaý úshin qosymsha kúshter men quraldar tartyldy. Oqıǵa ornyna taǵy bir «Qazavıaqutqarý» tikushaǵy jiberildi.  

İshki ister mınıstrligi Tótenshe jaǵdaılardy joıý kezinde qaza tapqan jáne zardap shekkenderdiń otbastaryna kóńil aıtady.