Álemde teńdesi joq Berel qoryq-mýzeıiniń qundy jádigerleri sıfrlyq formatqa kóshiriletin boldy. Bul týraly Shyǵys Qazaqstan oblysynyń Katonqaraǵaı aýdanynda Halyqaralyq jastar kúnine oraı ótken «Berel mádenıeti: jádigerlerdi sıfrlyq formatqa kóshirý» atty IX mobıldi medıa mektebiniń barysynda aıtyldy.

Ult rýhanıatyna úles qosar mundaı aıtýly bastamany uıymdastyrýǵa elimizdegi BUU jahandyq komýnıkasıa departamenti, Ál-Farabı atyndaǵy QUÝ jáne S.Amanjolov atyndaǵy SHQMÝ syndy irgeli mekemeler muryndyq boldy. Atalǵan shara aıasynda jergilikti BAQ ókilderine arnalǵan kóshpeli semınar ótti. Semınardy Ál-Farabı atyndaǵy QazUÝ-de 2016 jyly qurylǵan Jýrnalısıka mektebiniń ókilderi júrgizdi. Buǵan deıin kóshpeli semınarlar serıasy Ońtústik Qazaqstan, Pavlodar oblystarynda bolǵan.

– Úlken Berel qorǵandary aýmaǵynda ótkizilip jatqan semınardyń jaqsy bereri mol. Qatysýshylar ol jerdegi jádigerlermen, kóshirmelermen, syzbalarmen jumys istep, basqa da zertteýler júrgizdi, – deıdi S.Amanjolov atyndaǵy SHQMÝ-dyń Qazaqstan tarıhy kafedrasynyń meńgerýshisi Roza Cheketaeva.

Mobıldi medıa mektepte Berel mádenıetin sıfrlyq formatqa kóshirý jáne tarıhı jádigerlerdi saqtaý boıynsha qorym basynda jumys istep jatqan arheolog-stýdentterge semınarlar men sheberlik sabaqtary ótkizildi. Al osynaý sharaǵa qatysýshylar "Berel" memlekettik tarıhı-mádenı qoryq-murajaıyn aralap, qazba jumystaryn kózimen kórdi.

– Berel qorǵandary Shyǵystyń ǵana emes, búkil elimizdiń brendi dep nyq aıta alamyz. Ótkende ǵana munda Halyqaralyq sýretshiler birlestigi aýqymdy jumys atqardy. Qorǵannyń aýmaǵy sýretshiler men fototilshiler bas qosatyn orynǵa aınaldy, – deıdi belgili arheolog Zeınolla Samashev.