Nátıjesinde sýmen jabdyqtaý tarıfi 30%-ke tómendeýi múmkin.
Shymkent qalasyndaǵy sýmen jabdyqtaý jáne sý burý nysandary memleket menshigine qaıtaryldy, dep habarlaıdy Qarjylyq monıtorıń agenttigi.
Shymkenttegi sýmen jabdyqtaý nysandaryn 21 jyl boıy "Sý resýrstary – Marketıń" JSHS basqarǵan. Memlekettiń úlesi 22% bolǵan. Qarjylyq monıtorıń agenttigi nysandy basqarǵan seriktestiń qarjysyna taldaý júrgizgen.
"Kompanıada seriktes qurylymdarmen baılanysty kúmándi qarjy operasıalarmen qatar, shyǵyn belgileri, sýmen jabdyqtaý salasyndaǵy zań buzýshylyqtar anyqtaldy. Sý kodeksiniń talaptaryna sáıkes kelmegen. Jekeshelendirý kezinde prosedýralyq aýytqýlar bolǵany jáne tıimsiz basqarý faktiler belgili boldy. Materıaldar nysandardy memleket menshigine qaıtarý úshin ákimdikke joldandy", - deıdi agenttik.
Sý nysanyna qatysty másele Shymkent qalasynyń mamandandyrylǵan aýdanaralyq ekonomıkalyq sotynda qaraldy. Sot sýmen jabdyqtaý jáne sý burý nysandaryn jekeshelendirýdi jaramsyz dep taný jáne olardy bastapqy jaǵdaıyna keltirip, memleket menshigine qaıtarý týraly sheshim shyǵardy.
Nátıjesinde sýmen jabdyqtaý tarıfi 30%-ke tómendeýi múmkin. Bul týraly ákimdik aıtty.
