Jekemenshik mektepterdegi kemshilikterdi joıý maqsatynda tıisti ereje qabyldaý josparlanyp otyr. Bul týraly Oqý-aǵartý mınıstri Ǵanı Beısembaev búgin Parlament palatalarynyń birlesken otyrysynan keıin málimdedi.

Jýrnalıser mınıstrden jekemenshik mektepterdi qarjylandyrý máselesine qatysty suraq qoıdy.

– Jekemenshik mektepterdi qarjylandyrý keshigip jatqan joq. Barlyq qarajat bólindi. Qazirgi tańda tek 2-3 óńirde ǵana qarjynyń aýdarylýyna baılanysty jekemenshik mektepterdiń akt tapsyrý úderisinde kidiris bar, – dedi mınıstr.

Sondaı-aq tilshiler tarapynan «Eger jekemenshik mektepte 200 oqýshydan az bolsa, ol jabylady degen aqparat ras pa?» degen suraq qoıyldy.

– Sońǵy jyldary memlekettiń qoldaýy arqasynda keıbir kásipkerler 20-30 oqýshyny jınap, eshqandaı ınvestısıa salmaı-aq mektep ashyp jatyr. Al negizgi maqsat – jeke ınvestısıa arqyly mektep salý, ınfraqurylymdy damytý. Bizdiń baıqaýymyzsha, jekemenshik mektepterdiń 60-70 paıyzy eshqandaı jańa ǵımarat salmaǵan, burynnan bar nysandardy beıimdep qoldanyp otyr. Mundaı jaǵdaıda ata-analardy aldamaı, sapaly bilim berý – basty talap. Sondyqtan bul salada retteýdi qajet etetin máseleler bar. 200 oqýshy – bul 8 synyp jıyntyǵy. Eger mektep 1-synyptan 11-synypqa deıin jumys istese, «oqýshy kontıngenti tolyq pa?» degen suraq týyndaıdy. Jalpy, qazir jekemenshik mektepterge qatysty máseleler keshendi túrde qarastyrylyp jatyr, – dedi Ǵanı Beısembaev.