QR Prezıdenti Qasym-Jomart Toqaevtyń tapsyrmasyn iske asyrý aıasynda Úkimet rezervinen Shyǵys Qazaqstan oblysyndaǵy tozyǵy jetken jylý jelilerin jóndeý jáne qalpyna keltirý jumystaryna 2,5 mlrd teńgeden astam qarjy bólindi. Premer-mınıstr Oljas Bektenov tıisti qaýlyǵa qol qoıdy. Qarajat Rıdder qalasy men Q. Qaısenov kentindegi eń ózekti jylý jelilerin jóndeýge baǵyttalady.

Bólingen somanyń basym bóligi Rıdder qalasyndaǵy eń qatty tozǵan 5,9 shaqyrymdyq jylý jelilerin kúrdeli jóndeýge jumsalmaq. Al Q. Qaısenov kentinde uzyndyǵy 9 shaqyrym bolatyn jelilerdi jańǵyrtýdyń ekinshi kezeńin aıaqtaýǵa 113 mln teńge qarastyrylǵan.

Shyǵys Qazaqstan oblysyndaǵy eldi mekenderdiń jylý ınfraqurylymy 30 jyldan astam ýaqyt boıy paıdalanylyp keledi jáne osy aralyqta kúrdeli jóndeý kórmegen. Qazirgi tańda oblystaǵy jylý jelileriniń ortasha tozý deńgeıi 55 paıyzdan assa, keıbir eldi mekenderde bul kórsetkish 75 paıyzdan joǵary.

Buǵan deıin, 2024 jyldyń mamyr aıynda Úkimet rezervinen shamamen 1,7 mlrd teńge bólinip, Rıdder jylý elektr ortalyǵyndaǵy eki qazandyq agregatyn jóndeýge, №5 redýksıalyq-salqyndatý qondyrǵysyna avtomattandyrylǵan basqarý júıesin engizýge jáne elektrotehnıkalyq jabdyqtyń bir bóligin aýystyrýǵa baǵyttalǵan bolatyn.

Sońǵy eki jylda qalada jóndeý jumystary tótenshe jaǵdaıda júrgizilip, JEO-ny iske qosý jáne jylý jelilerin qalpyna keltirý boıynsha jedel sharalar qabyldandy. Sonyń nátıjesinde Rıdderdegi jylý jelileriniń tozý deńgeıi 82 paıyzdan 66,8 paıyzǵa deıin tómendedi.