Búgin tańerteń Ázerbaıjannyń İshki ister mınıstrligi Baký qalasyndaǵy «Sputnik Ázerbaıjan» agenttiginiń keńsesinde arnaıy operasıa júrgizip, birneshe adamdy ustady. APA agenttiginiń málimetinshe, ustalǵandardyń qatarynda Reseı Federaldyq qaýipsizdik qyzmetiniń (FSB) eki ókili bar. Olar osy ýaqytqa deıin atalǵan aqparat quralynda jumys istegen.
«Sputnik Ázerbaıjan» — Reseıdiń «Rossıa segodná» halyqaralyq medıa agenttiginiń Bakýdegi bólimshesi. 2024 jyldyń aqpan aıynda Ázerbaıjan bıligi agenttik qyzmetin ýaqytsha toqtatý týraly sheshim qabyldaǵan edi. Bul sheshim sheteldik BAQ-tyń el aýmaǵyndaǵy jumysyn retteý jáne ózara aqparat almasý teńdigin saqtaý maqsatynda qabyldanǵan.
Resmı talap boıynsha, Bakýde jumys isteıtin «Sputnik» jýrnalısiniń sany Reseıdegi ázerbaıjandyq «AZERTADJ» agenttiginiń tilshilerimen teń bolýy tıis bolǵan. Alaıda «Sputnik Ázerbaıjan» bul shartty oryndamaı, qyzmetin jalǵastyrǵan.
Qazir tergeý amaldary júrgizilýde.
