Kezdesý barysynda aımaqtyń jaı-kúıi, tolǵandyryp júrgen máseleleri, rýhanıat, til, ádebıet jaıy, ekologıa, el birligin nyǵaıtý jáne ıdeologıalyq jumystardy jolǵa qoıý taqyryptary jan-jaqty áńgime arqaýyna aınaldy.

Erkin pikir alysý formatynda ótken bas qosýda óńir zıalylary oblys kólemindegi máselelermen qatar, jalpy el damýyna, memleketti órkendetýge qatysty óz oılary men usynystaryn da búkpesiz ortaǵa saldy.

Pavlodarlyq belgili aqyn, qoǵam qaıratkeri Arman Qanıdyń «Nur Otan» partıasy shyǵarmashylyq zıalylardyń áleýetin eldigimizdiń irgetasyn bekemdeı túsý úshin baǵyttap, partıa qoldaýymen ótip jatqan aıtystar oblystarda da ótse eken» - degen pikirin qýattaǵan Baýyrjan Baıbek partıanyń osy baǵytta atqaryp jatqan sharalaryna keńinen toqtalyp, jınalǵandarmen eldiń saıası baǵdary jaıyndaǵy óz oılarymen bólisti.

«Bıyl «Nur Otan» partıasynyń uıytqysymen 77 aıtys ótedi. Kezinde bázbireýler «olar aıtystan qorqady, onda syn aıtady» degen bolatyn. Olaı emes. Biz ózimiz máselelerdi ashyq kóteremiz. Aıtyskerlerdi qoldaımyz. Jalpy aıtys – qazaqtyń kóneden kele jatqan dástúri. Sondyqtan ony qoldaý kerek. Halyq ony jaqsy kóredi. Biz elimizdiń túkpir-túkpirine taralatyn «Qazaqstan» telearnasymen kelisip, aıtysty praım-taımǵa qoıamyz da, halyqqa kórsetemiz.

Sonymen birge «Nur Otan» partıasy ulttyq sport túrlerin qoldap jatyr. Onyń qatarynda «Qazaqstan barysy», kúres, aýdaryspaq, teńge salý t.b. bar. Sondaı-aq ádebıetke de kóńil bólip jatyrmyz, jaqynda múshaıra ótkizemiz. Osy másele boıynsha bizde «Mıras» alańy bar. Aldymen osynda talqylaımyz da, sodan keıin osy máselelerge kóńil bólemiz», - dedi Baýyrjan Baıbek.

Jıynda ıdeologıa máselesi, saıası keńistiktegi jańalyqtar jaıy da sóz boldy. Baýyrjan Baıbektiń aıtýynsha, qoǵamda ár túrli pikirlerdiń aıtylýy qalypty qubylys. Bul - ashyq qoǵamnyń belgisi. Túrli pikirlerdi saraptaý arqyly halyq bir ortaq mámlege keledi. Bul rette Elbasy aıtqandaı, eń aldymen halyqqa qyzmet etýge basymdyq berip, kórshiles eldermen tatý turýymyz kerek.

Sonymen birge partıa tóraǵasynyń Birinshi orynbasary partıa tarapynan elimizde alǵash ret ótkizilgeli jatqan saıası tehnologıa – praımerızge de toqtaldy. Bul ashyq praımerız elimizde sáýir-mamyr aılarynda ótpek. Atalǵan shara ár túrli saladaǵy daryndy, bilimdi, elge jany ashıtyn, halyqty oılaıtyn adamdardyń bılikke kelýine, el isine aralasýyna múmkindik beredi.