El Prezıdenti Qasym-Jomart Kemeluly Toqaev halyqqa úndeýinde, qalyptasqan jaǵdaıdy ashyq aıtyp, elimizdegi indetke qarsy memleket tarapynan barlyq sharalar qabyldanyp jatqanyn jetkizdi.

Qazirgi atqarylyp jatqan jumystar, qabyldanyp jatqan sharalar halyq úshin óte mańyzdy. Óıtkeni dárihanalarda qajetti dári-dármekterdiń bolmaýy, aýrýhanalarda tósek oryndardyń tapshylyǵy, aýyrǵan adamdarǵa der kezinde tıisti medısınalyq kómektiń kórsetilmeýi qoǵamda oryn aldy, halyqtyń talabyna negiz boldy. Endi osy qabyldanǵan sheshimderdi, sharalardyń ýaqytynda júzege asyrylýyn, oryndalýyn baqylaý qajet jáne aýyryp jaqtan ár adamǵa naqty medısınalyq kómek kórsetilý kerek. Bul úshin bar múmkindikti paıdalanǵan jón. Ásirese, eren eńbek istep jatqan medısına qyzmetkerlerine aýrýlardy emdeýge baılanysty barlyq jaǵdaı jasap, olarǵa, otbasylaryna bar qoldaý, kómek kórsetilý qajet.

Aýrýhanalardy dári-dármekter, medısınalyq preparattar, apparattarmen qamtamasyz ete otyryp, qaı aýrýhanada qansha tósek orny bar, medısınalyq kómektiń sapasy, kólemi qandaı ekeni týraly shynaıy aqparatty halyqqa jetkizip otyrǵan jón. Óıtkeni halyq tarapynan aýrýhanaǵa barǵanda tósek oryn joq dep shyǵaryp salý máselesi jıi kóterilýde. Bul baǵytta ákimderdiń berip jatqan málimetteri óńirlerdegi aýrýhanalar men emhanalardyń jaǵdaıyna negizdelý kerek. Áıtpese, keıbir óńirdiń ákimderi aýrýhanalarda qosymsha tósek oryndary ashyldy, jaǵdaı jasaldy degen málimetteri bolsa da azamattar tósek oryndarynyń tapshylyǵyn, dári-dármekterdiń jetispeýshiligin, aýdan ortalyqtarynda PSR-laboratorıa joq ekenin, analız ýaqytynda shyqpaıtynyn, jaǵdaı jasalmaǵanyn kórip, tıisti medısınalyq kómekke qol jetkize almaı otyr. Óz kezeginde ákimder Prezıdentimizdiń – bizdiń jumysymyz aıqyn, qoǵam aldynda eshnárseni jasyrmaı, ashyq aıtamyz, – degen baǵytyn ustaný qajet.

Memleket basshysy dárigerlerimiz buqaralyq aqparat quraldary arqyly azamattarǵa naqty, birizdi málimet berý kerektigin, onyń mańyzdylyǵyn da atap ótti. Bul qazirgi tańda halyqty qoldaýdyń bir túri. Qazirgi jaǵdaıda, kóptegen azamattar úı jaǵdaıynda emdelýde. Olar mamandardyń, dárigerlerdiń kómegine zárý. Sondyqtan, telearnalar, áleýmettik jeliler arqyly da medısına sala qyzmetkerleri emdelýdiń joldaryn, túrlerin, qandaı dári-dármekter qajettiligi, olar qaı dárihanalarda bar ekeni týraly naqty aqparat berip otyrsa, bul da aýyryp jatqan adamdarǵa úlken qoldaý, jaqsy kómek bolar edi.

Dári-dármekter, apparattar satyp alýǵa, medısınalyq qyzmetkerlerdi yńtalandyrýǵa jáne basqa da kezek kúttirmeıtin máselelerdi sheshýge 150 mlrd tenge baǵyttalyp otyr. Úndeýde bul týraly ashyq jarıa ete otyryp, Prezıdent memlekettik bújetten bólinip jatqan barlyq qarajattyń jumsalýyn erekshe baqylaýda ustaıtynyn basa aıtty. Naqty sheshim shyǵardy. Óıtkeni, densaýlyq saqtaý salasyna bólinip jatqan qarajat tıimdi, maqsatyna saı jumsalyp, medısınalyq kómektiń kólemin, sapasyn jaqsartý kerek. Halyqqa memleket qarajaty qaıda, qalaı jumsalǵany týraly esep berilip, ol týraly aqparat jarıalanyp otyrǵany durys. Sonda ashyqtyq qalyptasady. Halyqtyń senimi artady. Jalpy, "SQ Farmasıa" JSHS-niń qyzmetine, onyń satyp alyp jatqan dári-dármekteriniń baǵasyna, sapasyna, ondaǵy memleket qarajatynyń jumsalýyna qatań baqylaý ornatylyp, jarıalyq bolý kerek. Óıtkeni, bul seriktestik búdjet qarajatyna dári-dármekpen qamtamasyz etetin jalǵyz operator, monopolıs. Bul baǵytta elimizde básekelestik bolǵanyn qoldaımyn.

El Prezıdentiniń qabyldaǵan naqty sharalary, sheshimderi mynandaı qıyn jaǵdaıda halyqqa kórsetiletin medısınalyq kómektiń kólemin kóbeıtýge, azamattardyń densaýlyǵyn jaqsartýǵa jol ashatyny sózsiz.

Al, biz óz tarapymyzdan qolymyzdan kelgen qoldaýdy, kómekti halyqqa kórsetemiz. Bar kómekterin kórsetip jatqan janashyr azamattar men eriktilermen birgemiz, qoldaımyz. Aq halatty abzal jandarǵa alǵysymyz sheksiz. Endi, azamattar da karantın erejelerin saqtaýǵa, onyń talaptaryn muqıat oryndaýǵa, indettiń taralýyna negiz bolatyn is-sharalardy ýaqytsha toqtatýǵa atsalysady dep oılaımyz.

Birigip, birlesip osy indetti jeńemiz!

Nurtaı Sabılánov,

Parlament Májilisiniń depýtaty