Búgin, 9 shilde kúni Qazaqstannyń eńbek sińirgen óner qaıratkeri, kompozıtor Keńes Dúısekeev qaıtys boldy. Bul týraly birneshe ánshi Instagram-da jazdy.

Kompozıtordyń naqty neden qaıtys bolǵany áli belgisiz. 

Keńes Dúısekeev 1946 jyly 10 aqpanda Qyzylorda oblysynda dúnıege kelgen. Kompozıtor, Qazaqstannyń eńbek sińirgen óner qaıratkeri.  1974-1976 jyldary "Gúlder" ansambliniń bas dırıjeri jáne mýzyka jetekshisi, 1976-1979 jyldary "Qazaqkonsert" gastróldik-konsert birlestiginiń mýzyka jetekshisi, 1975-1984 jyldary Qazaq teledıdary mýzyka redaksıasynyń bas redaktory bolyp qyzmet atqarǵan.

Dúısekeevtiń jetekshiligimen "Tamasha", "Halyq – talant qaınary", "Shabyt", "Jastarǵa arnalǵan mýzykalyq keshter", "Mýzyka áleminde" t.b. teledıdarlyq baǵdarlamalar shyǵaryldy.

1984-1997 jyldary Qazaqstan memlekettik teleradıo komıteti estradalyq-sımfonıa orkestriniń kórkemdik jetekshisi jáne bas dırıjeri boldy. 1997 jyldan "Qazaqkonsert" gastróldik-konsert birlestiginiń kórkemdik jetekshisi.

Ol – "Tolǵaý" sımfonıasynyń (1984), "Jalańtós batyr" sımfonıa poema-kartınasynyń (1996), "O, dúnıe" kantatasynyń (1997), "Jyl mezgilderi" romanstar sıkliniń (1991), "Mádı", "Aqqý Jibek" múzıkliniń, "Aldar kóse" operettasynyń, sımfonıa-konsertter, aspaptarǵa arnalǵan konsertter, kameralyq orkestrge shyǵarmalar, sonata, rapsodıa, varıasıalar jáne 200-den astam ánderdiń avtory.