İshki ister mınıstri Erlan Turǵymbaev áleýmettik jelide jalǵan aqparat taratqandar jaýapkershilikke tartylatynyn aıtty. 

– İshki ister organdary elde quqyq buzýshylyq áreketterdi anyqtaý barysynda áleýmettik jelide kún saıyn jalǵan aqparattyń taralýy jıilep ketkenin kórsetti. Biz mundaı habarlamalardy tekserip otyramyz. Qazirgi ýaqytta mundaı epıdemıologıalyq jaǵdaılardy jeke tulǵalar aýdıtorıanyń nazaryn aýdarý úshin paıdalanady. Olar aqparattyń shynaıylyǵyna kóz jetkizbeıdi. Osylardyń ishinde eń kóp taralǵan aýdıohabarlamalar: "vırýs eldi mekenge ushaqtar men tikushaqtardyń kómegimen shashyratqan", "Qazaqstanǵa bıohımıalyq qarý shashyratqan" jáne t.b. "Facebook" jáne "Instagram" áleýmettik jelilerinde keı paıdalanýshylar "Búgingi aýrýdyń órshýi bıologıalyq qarý-jaraqpen hımıalyq shabýyldan oryn alýy múmkin" dep habarlama taratty, – dedi mınıstr.

Ol bul habarlamalardyń barlyǵy rastalmaǵan jáne shyndyqqa janaspaıdy dep atap aıtty.

– Osy jáne basqa da uqsas faktiler boıynsha İİM tergeý departamenti qylmystyq kodekstiń 274-baby "Bile tura jalǵan aqparat taratý" boıynsha sotqa deıingi tergeý jumystaryn bastady. Munda aıyptalýshyǵa aıyppul, túzeý jumystary, 7 jylǵa deıin bas bostandyǵynan shekteý nemese aıyrý túrindegi jaza qoldanylady. Men azamattardy resmı derekterge ǵana senýge, arandatýlarǵa ushyramaýǵa jáne jalǵan aqparatty taratpaýǵa shaqyramyn, – dep atap ótti Erlan Turǵymbaev.