Ár ýaqyt, ár kezeń óz júıesin, óz "aýa raıyn" qalyptastyrady. Al qazir álem halyqtarynyń abyr-sabyr kezeńdi bastan keship otyrǵany jasyryn emes. Jappaı halyqty jalmap jatqan aty jaman vırýspen dúnıejúzi elderi karantın jarıalap, kúres júrgizip keledi. Alaıda úziliske de, daǵdarysqa da qaramaıtyn, kezek kúttirmeıtin máseleler bolady. Dúnıejúzilik ekonomıkalyq forýmnyń jahandyq básekege qabilettilik ındeksindegi róline nazar aýdarsaq, Qazaqstannyń bastamalary kóńil qýantady. Solarǵa toqtalyp óteıik.

QR táýelsizdik alǵaly beri kóptegen halyqaralyq tarıhı mańyzy bar sheshimder qabyldaǵany belgili. Birinshiden, 1991 jyldyń 29 tamyzynda qabyldanǵan ıadrolyq qarýdy taratpaý men qarýsyzdandyrý bastamasy. Bul – qazaqstandyqtar arasynda ǵana emes, búkilálemdik qoǵamdastyq tarapynan keń qoldaý tapqan tarıhı ári batyl sheshim. Ekinshiden, 1992 jyly qurylǵan Azıadaǵy ózara is-qımyl jáne senim sharalary jónindegi keńes (AÓSSHK), ıaǵnı qurlyqtaǵy máni zor qaýipsizdik qurylymy. Azıadaǵy beıbitshilik pen qaýipsizdikke únqatysý jáne yntymaqtastyq arqyly ǵana qol jetkizýge bolatynyn jarıa etken bul bastama Azıa elderi basshylary tarapynan úlken qoldaýǵa ıe boldy. Úshinshiden, Batys pen Shyǵystyń zamanaýı naqty jaǵdaılaryn esepke ala otyryp, soltústik Eýrazıa men Ortalyq Azıa elderiniń birtutas ekonomıkalyq, saıası keńistigin biriktirýdi maqsat etken Eýrazıalyq odaqtyń qurylýy. Sondaı-aq, BUU-nyń 100 jyldyǵyna usynǵan 2045 jylǵa deıingi Strategıalyq bastamany úlken jetistikter qataryna qosýǵa bolady. Munda barlyq ulttardyń álemdik resýrstarǵa jáne naryqqa qoljetimdiligin qamtamasyz etýge tıistigi, adamzattyń damýyna septigin tıgizetin úlken jaýapkershilik kórinis tabýy kerektigi basty nazarǵa alynǵan.  

Árıne, kenjelep damý kemshilikke jatpaıdy. 29 jyl – salystyrmaly túrde, uzaq merzim emes. Osy ýaqyt aralyǵynda Qazaqstan álemniń damyǵan alpaýyt elderimen ıyq tirestiretin deńgeıge jetti. Halyqaralyq  problemalardy sheshýde úlken ról atqaryp keledi. Bedeldi uıymdarǵa tóraǵalyq etý de elimizdiń bedelin arttyrdy. Jetistikter qataryna álemniń sarapshylar qaýymdastyǵyna álem ekonomıkasy máseleleri jóninde ashyq jáne buqaralyq pikirtalastardy júrgizýge jaǵdaı jasaıtyn kópfýnksıaly G-Global platformasyn, álem nazaryna ilikken EXPO-2017 kórmesin qosamyz. Bıyl ǵana Astana qalalyq týrızm boıynsha, segizinshi jahandyq samıtti ótkizý múmkindigen ıe bolǵanymyz týraly qýanyshpen habarlaǵan bolatynbyz.

Qazaqstannyń ekonomıkada, saıasatta, mádenıet jáne sportta jetken jetistikteri san alýan. Eýrazıa qurlyǵyndaǵy basty sharanyń biri sanalatyn Astana ekonomıkalyq forýmyna 2019 jyly álemniń 74 elinen sarapshy, kásipker, saıasatker men ǵalymdar qatysqany belgili. Rasynda, jahandyq máselelerdi sheshýde belsendi yntymaqtastyq asa mańyzdy. Búkilálemde jasyl ekonomıkaǵa arnalǵan ekojúıe joq. Bizdiń elimizde ótken forýmda osy másele talqylanyp, Qazaqstan men Saýd Arabıasy tıisti kelisimge qol qoıǵan bolatyn.

Álemdik máselelerdi kóteretin sharalardyń bastamashysy bolý – elimizdiń jetistigi. Elimiz taý qozǵalsa da qozǵalmaıtyn, daý izdese de jaý izdemeıtin, daraqylansa da dandaısymaıtyn halyq. Tarıh kórsetkendeı, Qazaqstannyń jahandyq ıdeıalary men bastamalary búkilálem ókilderiniń júrekteri men sanalarynan oryn taýyp, birtindep iske asý ústinde.