12 tamyz kúni qoǵam belsendisi Ásıa Tólesovaǵa qatysty úkim shyqty. Sot belsendini kináli dep tanyp, onyń bas bostandyǵyn bir jyl alty aıǵa shektedi, dep jazdy Azattyq Radıosy.

Almaty qalasy Medeý aýdandyq soty "Bılik ókilin qorlady" jáne "Bılik ókiline kúsh qoldandy" dep aıyptalǵan azamattyq belsendi Ásıa Tólesovaǵa úkim oqydy. Sot eki bap boıynsha da Tólesovany kináli dep tanyp, onyń bas bostandyǵyn bir jyl alty aıǵa shektedi. Buǵan qosa, sot shyǵynyn ótep, jábirlenýshiler qoryna shamamen 41 myń teńge tóleýdi mindettedi. Sýdıa Shákirov Tólesovany sot zalynan bosatýdy buıyrdy.

Qorǵaý taraby úkimmen kelispeıtinin, ony apelásıaǵa beretinin aıtty.

– Sot úkimimen kelispeımin. Ony apelásıaǵa beremiz. Qalaı bolǵanda da Tólesovany aqtaýǵa kúsh salamyz, – dedi advokat Djohar Ótebekov.

Sársenbi kúni aýdandyq sotta úkim oqylyp jatqan kezde sot ǵımaratynyń syrtynda belsendini qoldaǵan jastar jınalyp turdy. Sot úkimi oqylǵannan keıin olar "Sýdıa masqara!" dep aıqaılady.

Sottan keıin Ásıa Tólesovanyń jaqyndary, jaqtastary jáne aqparat quraldary belsendini qarsy alý úshin tergeý ızolátoryna ketti.

11 tamyz kúni ótken jaryssóz kezinde prokýror Tólesovanyń "qoǵamǵa qaýipti qylmystyq áreket jasaǵanyn" aıtyp, onyń bas bostandyǵyn bir jylǵa aıyrýdy jáne aıyppul tóletýdi suraǵan edi. Al qorǵaý taraby belsendiniń "kinásin dáleldeıtin" aıǵaq retinde kórsetilgen vıdeonyń jaramsyz ekenin aıtyp, ony aqtaýdy suraǵan.

Azamattyq belsendi Ásıa Tólesova Almatyda narazylar ustalǵan kúni – 6 maýsymdaǵy mıtıńiden keıin tutqyndalǵan. Ony narazylyq kezinde "polısıa qyzmetkerine kúsh qoldandy" jáne "qorlady" dep aıyptaǵan. Al belsendiniń ózi áleýmettik jelide mıtıń kezindegi zańsyzdyqtardy kórip turyp shydamaı, "emosıaǵa berilip, jaýap qaıyrdym" dep túsindirgen. Aldyn ala tyńdaý kezinde belsendiniń advokattary Tólesovanyń qoly polısıa qyzmetkeriniń basyna emes, fýrajkasyna tıgenin, olar fızıkalyq soqqy almaǵanyn aıtqan edi.

Vlast saıtynyń jazýynsha, osyǵan deıingi ótken otyrystarda jábirlenýshilerdiń tergeý organdary men sotqa bergen jaýabynda qarama-qaıshylyq bar ekeni de anyqtalǵan. Keıinirek tergeýshi aıyptaý aktisinde "tehnıkalyq qatelik" ketkenin moıyndaǵan.

Ásıa Tólesova 10 maýsymnan beri qamaýda bolǵan.

Buǵan deıin belgili halyqaralyq quqyq qorǵaý uıymdary Qazaqstan bıligin Ásıa Tólesovany bosatýǵa shaqyryp, belsendiniń negizsiz ustalǵanyn málimdegen.​