«Almaty» TA-nyń Akimat Live baǵdarlamasyndaǵy tikeleı efır barysynda megapolıs ákimi Baqytjan Saǵyntaev kásipkerlerdi yntymaqtastyq tanytýǵa jáne karantındik shekteýlerdi qatań saqtaýǵa shaqyrdy.

Qala turǵyndarynyń suraqtaryna jaýap bere otyryp, B. Saǵyntaev 32 montorıngtik toptardyń belgilengen shekteýlerdiń saqtalýyn qadaǵalaıtyndaryn eske saldy. 8 qazannan 17 qarasha aralyǵynda 444 reıd júrgizildi, onyń barysynda 3,6 myńǵa jýyq nysan tekserildi.

Tekserý barysynda 828 nysanda (22,5%) buzýshylyqtar anyqtaldy, 90 zańdy tulǵaǵa 28,7 mln tg kóleminde 453 ákimshilik aıyppul salyndy. Maska rejımin buzǵan jeke tulǵalarǵa 15,5 mln tg aıyppul salynyp, 374 ákimshilik quqyq buzýshylyq hattama toltyryldy.

«Alda kúrdeli kezeń tur, aýrý órshı túsetin bolady. Vaksına paıda bolǵansha biz sanıtarlyq-epıdemıologıalyq qaýipsizdik sharalaryn qatań saqtaýǵa tıispiz», — dep atap ótti B. Saǵyntaev.

Megapolıs ákimi oıyn saýyq jáne qoǵamdyq tamaqtandyrý salalarynda jumys jasaıtyn SHOB ókilderin osynaý kúrdeli kezeńde yntymaqtastyq tanytýǵa bir qadam jasaýǵa shaqyrdy.

«Eger biz birimizge-birimiz kómektespesek, buzýshylyqtar jalǵasady, ıaǵnı koronavırýs ınfeksıasyn juqtyrǵandar sany artatyn bolady. Sondyqtan almatylyq yntymaqtastyqty tanytyp, karantınge qatysty belgilengen jumys kestesin saqtaý qajet», — dep atap ótti B. Saǵyntaev.