Almatynyń sıfrlyq ınfraqurylymynyń damýy týraly Óńirlik komýnıkasıalar qyzmeti alańynda ótken onlaın-brıfıng barysynda qalanyń Sıfrlandyrý basqarmasynyń basshysy Baıan Qońyrbaev aıtty.

Spıkerdiń aıtýynsha, qazirgi ýaqytta «Elektrondyq úkimettiń» servıstik ıntegratory «Zerde» holdıńimen birlesip Almaty ákimdiginiń AT-arhıtektýrasyn ázirleýde. Osy maqsatta aqparattyq júıelerdi túgendeý, aǵymdaǵy ahýaldy taldaý júrgizildi jáne odan ári damý basymdyqtary aıqyndaldy.

«2020 jyldyń 1 jartyjyldyǵynyń qorytyndysy boıynsha Almaty qalasy elimizdiń barlyq óńirleri arasynda „aqyldy“ qalalar reıtıńinde birinshi orynǵa ıe boldy. 2019 jyly biz ekinshi orynǵa ıe boldyq. Bul reıtıńti aqparattandyrý salasyndaǵy ýákiletti organ „aqyldy“ qalalardyń etalondyq standarty negizinde júrgizedi. Bul standart qala tirshiliginiń 11 baǵyty boıynsha 100-den astam jobany qamtıdy», — dep habarlady B. Qońyrbaev.

Qazirgi ýaqytta Almaty qalasy ákimdiginiń memlekettik qyzmetter túrleriniń 90%-y elektrondy bolyp tabylady. balabaqsha.open-almaty.kz, bilimalmaty.kz aqparattyq júıesi, «Damýmed» medısınalyq aqparattyq júıesi, «InfoLab» AJ, Avtomatty dıspecherlik aqparattyq júıesi, «Emdeýge jatqyzý búrosy» portaly jáne t. b. syndy aqparattyq júıeler qyzmet etýde.

AT-qoǵamdastyǵymen ýaqtyly aqparattandyrý jáne ózara belsendi is-qımyl jasaý úshin digital-almaty.kz. portaly ázirlendi. Onyń platformasynda ázirleýshiler qalany sıfrlandyrý boıynsha óz ıdeıalaryn usyna alady.

«Eger sizde qyzyqty qosymsha nemese jańa aqparattyq júıeni qurý ıdeıalary bolsa, olardy portalǵa ornalastyra alasyz. Eger sizderdiń usynystaryńyz qyzyqty bolsa, biz olardy júzege asyrýǵa kómektesemiz. AT-mamandaryn, kreatıvti sıfrlyq uıymdastyrýshylardy bizdiń portaldy óz ıdeıalaryn ornalastyrý úshin paıdalanýǵa shaqyramyz», — dep úndedi B. Qońyrbaev.