Ótken jyldyń qazan aıynda Temir aýdanynyń Tasqopa eldi-mekenindegi qorymnan tabylǵan sarmat kóseminiń qorǵany men áshekeı altyn buıymdardy zerttep qalypqa keltirýdiń birinshi kezeńi aıaqtaldy. Bul jóninde Á.H. Marǵulan atyndaǵy arheologıalyq ınstıtýttyń bas dırektory Baýyrjan Baıtanaev Aqtóbe oblysynyń ákimi Ońdasyn Orazalınmen kezdesýinde málimdedi. “Rýhanı jańǵyrý” baǵdarlamasy arqyly júzege asyrylyp jatqan zertteý jobasyna 7 ǵylym kandıdaty, 4 ǵylym doktory, 2 akademık jumyldyrylǵan.  Jobany zertteý 3 kezeńnen turady. Tarıhı jádigerler tolyq zerttelgen soń Aqtóbe oblystyq tarıhı- ólketaný mýzeıine tapsyrylyp, kópshilik nazaryna usynylmaq. Ońdasyn Orazalın ınstıtýt dırektoryna zertteýdiń ekinshi kezeńin júıeli jalǵastyrýdy, sarmat jaýyngeriniń buıymdaryn restavrasıalaý jumystaryn aldaǵy jyldyń kókteminde aıaqtaý kerektigin tapsyrdy. Aıtyp óteıik, budan ózge de “Aqtóbe oblysynyń kıeli jerleriniń geografıasy" ǵylymı baǵdarlamasy aıasynda ınstıtýt tarapynan iri jeti ǵylymı - zertteý jobalary oryndalýda.