OTANǴA

Kim dep men tunyǵymdy laılaǵan,

Kúnine júz tolǵanyp myń oılanam.

Sen úshin sertke berik semser ulmyn,

Aýlyna aqıqattyń jyr baılaǵan.

Oılaımyn taǵdyryńdy, erteńińdi,

Umytam qalaı ótken ertegińdi.

Otyryp jyr kemede bolashaqqa,

Jaıamyn jelbiretip jelkenimdi.

Bir ýys topyraǵyńdy qorǵashtaǵan,

Adamnyń barlyǵy da joldas maǵan.

Jasasa saǵan zorlyq, bir qıanat,

Batyryń men bolamyn qol bastaǵan.

Sen úshin eshkimnen de aıanbaımyn,

Kóńilimdi, mine, bylaı baıandaımyn.

Ańdyǵan aram oıly ala kózge,

Oq bolyp atylýdan taıanbaımyn.

Janyńa jylýymmen qýat berem,

Aryńa araılanǵan shýaq berem.

Basyńa qonǵan baqyt amandyǵyn,

Alladan kúndiz -túni surap kelem.

O, Otan, seni sheksiz súıip ótem,

Basymdy saǵan máńgi ıip ótem.

Ordaly Otan bolǵan qandaı baqyt?

Otansyz adamdardyń kúıi bóten.

                ÓZ ELİM

Bulaǵyń bolyp aǵaıyn,

Shyraǵyń bolyp janaıyn,

Kóńilińniń qoshyn tabaıyn,

Qabyl  da qylsań, aǵaıyn.

Aıyń da bolyp qaraıyn,

Aq sáýleń bolyp taraıyn,

Ashylsa altyn saraıyń,

Kiltiń bolyp baraıyn.

Baqytyń- baǵyń bolaıyn,

Yrysyń bolyp qonaıyn,

Baılyǵyń bolyp tolaıyn,

Kúnderiń ótse tolaıym.

Kúniń de bolyp týaıyn,

Túnińdi qara qýaıyn.

Basyńda bolsa ýaıym,

Kózińniń jasyn jýaıyn.

Ne deseń sony óteıin,

Jaýyńa jalǵyz tóteıin.

Ózgeni ańsap neteıin,

Ózińe jyldam jeteıin.

Ózegim bolǵan, óz elim,

Sadaǵań bolyp keteıin.

Ógeı de myna ómirge,

Ózińdi tıanaq eteıin!

             QAQPAŃDAR

Betimnen meniń qaqpańdar,

Qańǵyda basqa shatpańdar.

«Halqym!» dep kelgen qandaspyn,

Qaımana jurtqa satpańdar.

Qaqpańdar meni, qaqpańdar,

Aldymda atar aq tań bar.

Quıǵyta shapsam quladaı,

Kes - kestep jolda jatpańdar.

Qaqpańdar meni qaqpańdar,

Betaldy ketip shatpańdar.

Kópirte kókke kóterip,

Aıdar da maǵan taqpańdar,

Jamandap jala jappańdar.

Qaqpańdar meni qaqpańdar,

Qalaýym taýyp baptańdar.

Báıgeden kelsem qara úzip,

Batyrash bolyp atpańdar,

Qorǵanym bolyp saqtańdar.

                  NAMYS

Jerińdi qorǵamysań namys,

Erińdi qoldamasań namys.

Janalyp alyp - janberisken jaǵalasta,

Jaýyńdy qorǵalasań namys.

Otandy súımegeniń namys,

Otanǵa kúımegeniń namys.

Azǵyndap aqylyńnan aqymaǵym,

Rýhyńnan kúıregeniń namys.

Tilińdi bilmegeniń namys,

Dinińmen júrmegeniń namys.

Ulyqtar uly bolsań, ultyńdy

Kózińe ilmegeniń namys.

Elińe ermegeniń namys,

Peıilińdi bermegeniń namys.

Torǵaıdaı toz -toz bolyp uıasy joq,

Otanǵa kelmegeniń namys.

               AQYN SERTİ

Shymyrlanyp shyqpaı ma óleń degen,

Óleń dese jan edim eleńdegen.

Shárbátyna bal tildiń bólenbegen,

Aqyn, aqyn bolmaıdy kóreńdegen.

Bireý aıtqan oıdy kóp dáriptemen,

Oı degendi oınatyp alyp kelem.

Kók teńizi kóńildiń býyrqanyp,

Sharasynan shaıqalad shabyt degen.

Aq jol tilep aldymnan, aǵyp kelem,

Qanatymdy lashyndaı qaǵyp kelem.

Tasty talqan eterlik senim barda,

Nemeneden jasqanam, qaýiptenem?

Burqyratyp-shańdatyp shaýyp kelem,

Shańymmenen jer -kókti jaýyp kelem.

Sóz súleıin izdeseń, menen izde,

Aq qola emes, altynyn taýyp berem.

Caıgúligin mingizip saýytpenen,

Jaýyńger- jyr jasaımyn “ zavotpenen”.

Gúlge orap jaınatyp tóńeregin ,

Ólik- óleń ákelmen tabytpenen.

Shaıahmet QALI