İshki ister mınıstrligi mereke qarsańynda qaýipsizdik sharalary kúsheıtiletinin habarlady.

İshki ister mınıstri Erlan Turǵymbaevtyń buıryǵyna sáıkes aldaǵy merekeler qarsańynda Qazaqstannyń ishki ister organdarynyń jeke quramy kúsheıtilgen qyzmet túrine aýystyrylady.

Polısıa quqyqtyq tártipti, azamattardyń qaýipsizdigi men tynyshtyǵyn qamtamasyz etý, sondaı-aq quqyq buzýshylyqtar men qylmystardyń aldyn alý boıynsha is-sharalar keshenin júrgizedi. Quqyq buzýshylyqtar týraly habarlamalarǵa jedel den qoıý úshin mereke kúnderi polısıa avtopatrýlderiniń, kóshelerdegi polısıa jaıaý narádtarynyń sany artady. Jol júrisi qaýipsizdigin qamtamasyz etý boıynsha qosymsha sharalar qabyldanyp jatyr.

"Jazataıym oqıǵalardyń aldyn alý úshin sertıfıkattalmaǵan pırotehnıkalyq ónimdi satýǵa jol bermeý maqsatynda tekserýler júrgiziledi. Olardy paıdalaný kezinde saqtyq sharalaryn qatań saqtaý qajet. Mereke qarsańynda İİM turǵyndardy karantın sharalary men densaýlyq saqtaý uıymdarynyń usynystaryn qatań ustanýǵa, qoǵamdyq tártipti saqtaýǵa, óz múlikterine saq bolýǵa shaqyrady. Qalta urlyǵyna jol bermeý úshin qundy zattardy kózge kórinetin jerge qoımańyz, ámıandaryńyzdy kıimniń ishki qaltasyna salyńyz" delingen mınıstrlik málimdemesinde.

Sondaı-aq İİM tómendegilerdi rekomendteıdi:

- Mereke kúnderi barlyq esikterdi qulyppen jabý kerek.

- Qonaqqa ketken kezde kórshilerge úıińizdi qarap qoıýdy tapsyryp qoıǵan jón. Eger kireberiste esikti ashýǵa tyrysyp jatqan beıtanys adamdy kórseńiz, polısıaǵa qońyraý shalý qajet.

- Páterge az tanıtyn jáne beıtanys adamdardy kirgizýge bolmaıdy.

- Zattaryńyzdy avtomobıldiń júksalǵyshyna salyp jatqan kezde, sómkelerdi salonda qaraýsyz qaldyrmańyz. Kólikti turaqqa qaldyrǵan kezde, esikter men terezelerdiń jabyq ekenin tekserińiz.

- Jańa jyl aldyndaǵy aksıalar kezinde ınternet-alaıaqtyq kóbeıedi.

- Onlaın satyp alý kezinde tekserilgen saıttardy paıdalanyńyz. Fıshıngtik saıttardyń qurbany bolmaý úshin saıttyń mekenjaı jolaǵynda durys jazylýyna nazar aýdaryńyz.

- Jaraqat pen órttiń aldyn alý úshin pırotehnıkany paıdalaný kezinde qaýipsizdik erejelerin saqtaý qajet.