Indonezıadaǵy eń úlken kitaphanada qazaq ádebıetiniń jınaǵy paıda boldy, dep habarlady 24.kz saıty.

Onyń tusaýkeserin elimizdiń Djakartadaǵy elshisi Danıar Sárekenov jasady. Saltanatty ashylýy Abaıdyń 175 jyldyǵyna oraılastyryldy. Jınaqtaǵy eń mańyzdy kitap – ındonezıa tiline aýdarylǵan qazaq oıshyldyń qara sózderi. Bul basylymdy Adıtıa Adrı Saleh Ab Rahım bastaǵan bir top ǵalymdar daıyndady. Qazaqstan elshiliginiń tapsyrmasymen áıgili Balı aǵash sheberi Vaıan Mýdana Abaı músinin jasaǵan. 24 qabatty Indonezıa Ulttyq kitaphana ǵımaraty álemdegi eń bıik ǵımarattyń biri bolyp sanalady. Jańa tehnologıalarmen jabdyqtalǵan jóndeýden ótken kitap qory 3 jyl buryn ashylǵan. Kitaphana dırektorynyń orynbasary Voro Harıantı aıtqandaı, qazaq kitaptarynyń qory tolyqtyrylady. Atap aıtqanda, Qazaqstannyń Ulttyq kitaphanasymen yntymaqtastyq jalǵasady.

Voro Harıantı, Indonezıa ulttyq kitaphanasy dırektorynyń orynbasary:

– Abaıdyń qara sózderi – aqynnyń halyq tárbıesi men dúnıetanymyn, adamgershilik pen quqyq, qazaq tarıhy máselelerin kótergen eń uly shyǵarmalarynyń biri. Ol ómirdegi mańyzdy suraqtarǵa, shyndyq týraly bilimge jaýap beredi jáne ómirdiń ózin jaqsy túsinýge kómektesedi. Abaıdyń nazar aýdararlyq ómirlik sabaqtary kóptegen oqyrmandardy shabyttandyratynyna senimdimin, óıtkeni onyń fılosofıalyq paıymdaýy tek Qazaqstanǵa ǵana emes, barlyq elderge de qatysty.