Biryńǵaı jınaqtaýshy zeınetaqy qory jınaqtyń bir bóligin qalaı paıdalanýǵa bolatynyn túsindirdi.

Qor málimetine sáıkes, 2020 jyldyń 1 jeltoqsandaǵy jaǵdaı boıynsha 761 myńnan astam jumys isteıtin salymshy jalpy kólemi 2,4 trln teńgeden astam qarajatty merziminen buryn paıdalaný quqyǵyn qoldana alady. Jınaqtardyń jetkiliktilik somasynan asatyn ortasha somasy shamamen 3,2 mln. teńgeni quraıdy.

Zeınetaqy jınaqtarynyń bir bóligin paıdalaný quqyǵyn iske asyrý úshin azamattar, eń aldymen, óz jınaqtaryn tekserip, jetkiliktilik sheginen asatyn qajetti somanyń bar ekenine kóz jetkizýge tıis.

Zeınetaqy jınaqtaryn alý týraly sheshim qabyldaǵan adamdar turǵyn úı satyp alý jáne emdelý máseleleri boıynsha ýákiletti operatorǵa júgine alady, ony Úkimet aıqyndaıdy.

Salymshy zeınetaqy jınaqtaryn maqsatty qajettilikterge alǵan kezde jeke tabys salyǵyn tóleý tásilin tańdaý quqyǵyna ıe bolady (jarnalar aýdarylǵan kezde JTS alynbaǵanyn eskertemiz). Iaǵnı azamattar JTS tóleýdi keıinge qaldyrýdy tańdasa bolady ne turǵyn úı jaǵdaılaryn jaqsartý jáne emdelýge aqy tóleýge arnalǵan jınaqtaryn alǵan kezinde JTS-ty tolyq kólemde óteı alady.

"Zeınetaqy jınaǵy arnaıy shotta 45 jumys kúninen aspaıtyn ýaqyt ishinde jatady. Osy merzim ishinde jınaq nysanaly maqsaty boıynsha paıdalanylýǵa nemese salymshynyń BJZQ-daǵy zeınetaqy shotyna qaıtarylýǵa tıis" delingen resmı habarlamada.

Al zeınetaqy jınaǵynyń bir bóligin senimgerlik kompanıanyń basqarýyna berý úshin salymshy BJZQ-ǵa qajetti qujattarmen birge ótinish jazady. Ony jeke ózi aparyp beredi, ıa bolmasa, enpf.kz ınternet-resýrs arqyly elektrondy sıfrlyq qoltańbamen jibere alady. Budan bólek, zeınetaqy jınaǵyn tegin medısınalyq kómektiń kepildik berilgen kólemine kirmeıtin emdeý sharalaryna jumsaýǵa bolady.