Búlleten nómiri birinshi Qazaqstan Halyq partıasy Almatyda saılaýaldy shtabynyń keńsesinde qalalyq máslıhat depýtattyǵyna kandıdattar men partıa kóshbasshylarynyń onlaın konferensıasyn ótkizdi.

Partıa músheleri saılaý naýqanynyń aralyq qorytyndysyn shyǵaryp, aldaǵy májilis pen máslıhat saılaýyna daıyndyq jónindegi jumys josparyn talqylady.

Ózekti máselelerdi talqylaýǵa Qazaqstan Halyq partıasy kóshbasshylarynyń biri Jambyl Ahmetbekov qatysyp, sóz sóıledi. Ol memleket ónimdi jáne laıyqty aqy tólenetin eńbek quqyǵyn qamtamasyz etýi tıis ekenin málimdedi.

– Ekonomıka ósimdi kórsetse de, halyq muny sezbeıdi. Biz ónimderdi, taýarlardy, jabdyqtardy ımporttaımyz jáne baǵanyń úzdiksiz ósýin baıqaımyz. Qazaqstandyqtardyń dollardaǵy ortasha tabysy 2008 jyldan beri ósip kele jatqan joq. Qazaqstanǵa halyqtyq ekonomıka qajet. Mundaǵy negizgi basymdyq – JİÓ-niń ósýi emes, turaqty jumyspen qamtý jáne halyq tabysynyń ósýi, – dedi partıa tóraǵasy.

Al «Nur Otan»-nyń Respýblıkalyq saılaýaldy shtaby elimizdiń barlyq 17 óńirin aralady.

Ár qala men aýdanda partıa ókilderi jastarmen, kásipkerlermen, dárigerlermen, muǵalimdermen, zeınetkerlermen, jumysshylarmen, agrarshylarmen, zıalylarmen kezdesip, ózekti máselelerdi talqylady. Partıanyń kózdegen maqsatyn, alǵa qoıǵan mindetteriniń oryndalýyna qandaı kepildikter beretinin túsindirdi.

– «Nur Otan»-nyń úgit-nasıhat jumystary dabyra-daqpyrtsyz, mazmundy da qarqyndy ótti. 7 mıllıon saılaýshyny qamtyp, 28 myńnan astam is-shara uıymdastyryldy. Olardyń bári buqaralyq is-sharalar emes – naqty adamdarmen ózekti máselelerdi talqylaýǵa arnalǵan taqyryptyq kezdesýler. Ýaqytymyzdyń 80%-in azamattardyń saýaldaryna jaýap berýge arnadyq», – dedi saılaýaldy shtab jetekshisi Baýyrjan Baıbek.

Onyń aıtýynsha, «Esikten esikke» aksıasy aıasynda jasotandyqtar 1,4 mln. úı men páterlerdi aralap, 6,2 mln. úgit materıaldaryn taratqan. Óńirlerde qoǵamdyq qabyldaýlar qyzý jumys istep, 95 myńnan astam ótinish tústi. Olardyń úshten biri – usynystar men amanattar.

«Aýyldyqtar» bolsa, úgit-nasıhat aıasynda 2145 aýylǵa barǵan. Bul «Aýyl» Halyqtyq-demokratıalyq patrıottyq partıasynyń Almaty oblysyndaǵy «Baıserke-Agro» JSHS-i bazasynda ótken «Aýyl  – el yrzyǵynyń ıesi!» atty saılaýaldy naýqanyn aıaqtaý aksıasy barysynda belgili boldy. İs-sharaǵa partıa tóraǵasy Álı Bektaeva, QR Parlamenti Májilisi men barlyq deńgeıdegi máslıhattarǵa kandıdattar qatysty.

«Aýyl» partıasynyń tóraǵasy úgit-nasıhat jumystarynyń qorytyndysyna toqtalyp, osy is-sharany ótkizý orny men formatyn tańdaý kezdeısoq emes ekenin atap ótti, óıtkeni baǵdarlamalyq platformanyń basty baǵyty AÓK-ti damytý jáne aýyldy jandandyrý bolyp tabylady.

Ol bir aı ishinde barlyq óńirlerde tolyq aýqymdy úgit-nasıhat naýqany júrgizilgenin atap ótti. «Aýyl» partıasynyń úgit jumysy bir kúnge de toqtaǵan joq. Úgit-nasıhat jumysynyń alǵashqy kúninen bastap respýblıkalyq jáne oblystyq BAQ-ta jarıalaýmen 200-den astam is-shara ótkizildi. Bekitilgen medıa-josparǵa sáıkes óńirlerde QR Parlamenti Májilisiniń depýtattyǵyna kandıdattardyń qatysýymen tıisti deńgeıde 300-den astam is-shara uıymdastyryldy.

6000-nan astam is-shara oblystyq jáne aýdandyq máslıhattarǵa kandıdattardyń qatysýymen respýblıkalyq jáne óńirlik buqaralyq aqparat quraldaryn tarta otyryp uıymdastyryldy, oǵan «Aýyl» partıasynan depýtattyqqa kandıdattardyń kásiporyndar ujymdarymen kezdesýleri, keńester, dóńgelek ústelder, fleshmobtar kirdi. 20 jeltoqsannan bastap «Aýyldan Aýylǵa» respýblıkalyq aksıasy bastaldy, onyń maqsaty eń shalǵaı aýyldardyń turǵyndarymen kezdesý jáne olarǵa partıanyń saılaýaldy baǵdarlamasyn jetkizý. Osy ýaqyt ishinde barlyq deńgeıdegi depýtattyqqa kandıdattar 2145 aýylǵa bardy.

«Aq jol» demokratıalyq partıasy limizdiń barlyq qalalarynda «Aq jolmen» birge jarqyn jolmen!» avtosherýi elimizdiń barlyq qalalarynda ótkizdi.

Mundaı  naýqandy «Aq joldyń» respýblıkalyq shtaby dástúrli túrde úgit-nasıhat naýqanynyń sońǵy kúninde uıymdastyrady.

Búgin Qazaqstannyń barlyq óńirindegi «Aq jol» partıasynyń keńselerinen jalaýlar men dempartıanyń úgit atrıbýttarymen bezendirilgen aq avtokólikter legi bir mezgilde jolǵa shyqty.

Kólikterdiń túsiniń aq bolýy kezdeısoqtyq emes, ol «Aq jol» demokratıalyq partıasynyń ataýy - jarqyn jolmen sáıkes keledi. Aq tús tazalyqty, tańdalǵan joldyń ashyqtyǵyn bildiredi.

Avtokólikterdiń baǵyttary qazaqstandyq qalalardyń barlyq ortalyq kóshelerin, kópirlerin, jolaıyryqtaryn jáne dańǵyldaryn qamtydy. Naýqanǵa qatysýshylar azamattardy 10 qańtarda saılaýǵa kelip, «Aq jol» partıasyna daýys berýge shaqyrdy.

«ADAL»  partıasy saılaý aldyndaǵy jarystyń sońǵy úgit kúnin Qazaqstandaǵy parlamenttik saılaý tarıhynda tuńǵysh ret depýtattyqqa úmitkerlerdiń 12 saǵattyq tikeleı efırin júrgizýde.

«ADAL» partıasynyń Instagram men Feısbýktegi resmı paraqshalarynda, sondaı-aq Youtube-kanalynda úzilissiz tikeleı efır 8 qańtarda saǵat 12.00-den bastap ótýde. Tikeleı efır BAQ pen Internette kez-kelgen úgit materıaldaryn jarıalaýǵa tyıym salynǵan «tynyshtyq kúni» dep atalatyn kún bastalýǵa bir mınýt qalǵanda aıaqtalady.

Tikeleı efırdy májilis depýtattyǵyna úmitkerler Maqsat Tolyqbaı, Dáýlet Muqaev, Oljas Ordabaev, Almasbek Sadyrbaev, Laýra Malıkova, Aqmaral Bekmurzaeva, Alına Asqarova jáne partıa ókilderi Nurlybek Muqanov, Anýar Kerembaev júrgizýde.

Úmitker Maqsat Tolyqbaı «ADAL»-dan májilis depýtattyǵyna 16 úmitker, sondaı-aq barlyq deńgeıdegi máslıhattarǵa 537 úmitker bir aıǵa jýyq ýaqyt boıy úgit-nasıhat jumystaryn júrgizgenin atap ótti.

– Bul eldiń 22 qalasy men 163 aýyldyq aımaǵynda 4918 kezdesýdi qamtydy. Kezdesýlerge 138856 azamat qatysty. Bizdiń, árıne, saılaýshylarmen aıtatyn jáne bólisetin nárselerimiz bar. Efırde partıanyń qundylyqtary, partıa baǵdarlamasynyń negizgi mindetteri týraly aıtamyz. Biz turǵyndardan kelip túsken suraqtarǵa jaýap berýge, ózekti máselelerdi talqylaýǵa erekshe nazar aýdaramyz, – dedi ol.

Onyń aıtýynsha, el turǵyndary túrli suraqtar qoıyp, túrli ótinishter jasaıdy.

– Bireý jalaqynyń azdyǵyna, turǵyn úıdiń joqtyǵyna, aýyz sýǵa jáne jumyssyzdyqqa shaǵymdanady. Al bireý bilim berýdi, densaýlyq saqtaýdy jaqsartý týraly aıtady. Kún saıyn biz azamattardyń partıaǵa kirýge degen umtylysy týraly ótinishter aǵymyn tirkeımiz: qalalar men aýyldarda ornalasqan 3000 qorapqa kezdesýlerdiń nátıjeleri boıynsha 177 myńnan astam ótinishter kelip tústi. 69 myńnan astam ótinish adalpartiyasy.kz saıtyna tústi. Nátıjesinde biz, partıa músheleri, 300 myńnan asyp kettik, –  dedi Maqsat Tolyqbaı.