Qazaqstanda "til" degen ábden jaýyr bolǵan taqyryp. Ol jetpegendeı ultty bólip "shala qazaq pen taza qazaq" degen sózder qalyspaıdy. Bir qaýymdy ekige ajyratyp, bir-birine súıkimsiz etip kórsetý - qazaqqa baǵyttalǵan tildik shabýyldardyń biri.

Jaraıdy, meıli, qazaqsha túsinbesin, sóıleı almasyn, "máńgúrt" dersiz aınalyp kelgende qara kózdi, qany qazaq baýyrymyz ǵoı. Ózekke teýip, alaıyp qaraıtyndaı ata jaýyrymz ba edi?! Onyń bar aıyby - bireýdiń otary bolǵan halyqtyń urpaǵy bolǵandyǵy. "Arbanyń aldyńǵy dóńgelegi qalaı dóńgelese, artqy dóńgelegi solaı dóńgeleıdi", aldyńǵy býynnyń tili, dili, dini qyspaqta bolǵan soń, onyń balasyna baryp qandaı min taǵyp, jamandaýǵa keledi, oılanyp qarasańyz.

El bolyp, etek-jeńimiz jınalyp kele jatqanda, qaıtadan basqa arnaǵa buryp, kósh-kerýendi adastyrmaq bolyp jatqandardyń isi - bul. Sondyqtan, óz qandasymyzdy bótensý, kúndeý - ulttyń taǵdyryna balta shabý.

"Keń qoltyq halyq" degen ataq alyp, ózgelerdi - aǵaıynym dep jatqanda, "tili múkis" dep ózinen-ózi jerkengeni - qazaqtyń qaı sasqany?! Balasy qansha maskúnem bolyp ketse de, ákesi "urpaǵymnyń jalǵasyn jalǵaıdy" dep ulyn qushyrlanyp jaqsy kórmeı me?! Keremet aq peıil, jyly júrekti bolyp bara jatsa sóıleý bilmeı jatqan qandasyna anadan daryǵan tilin úıretsin, qazaqtyń qandaı darhan ekenin kórsetsin. Sógip, aıaqqa taptap, óz ókilinen bezinse ulttyq berekesinen ne saý-tamtyq qalmaq?!

Ulttyq emes, adamı kózqaraspen qarasańyz unatpaıtyn adamyńyzben júzdesken saıyn taıtalasa berseńiz, arada qaıdan bitim, kelisim bolady? Odan da jónge kelip, qısynyn tapsańyz, ol da doǵarylady emes pe?! Mynaý da dál sondaı jaǵdaı bolyp tur... Bastysy - baq-bereke, birlik bolyp, qazaqtyń mártebesiniń túspeýi.

Azamat Máýlenuly