Jaıylymdyq jerlerdiń, aýyl sharýashylyǵyna qajet sýdyń jetispeýshiligi, maman tapshylyǵy, tuqymdardyń qymbattyǵy men tozyǵy jetken tehnıka. Aýyl sharýashylyǵy salasyndaǵy osy jáne ózge de sheshimin tappaǵan túıitkildi máseleler «Nur Otan» partıasynyń Agrarlyq sektordy damytý jónindegi respýblıkalyq qoǵamdyq keńesiniń alǵashqy otyrysynda talqylandy. Osy jıynda jańa keńestiń quramy bekitilip, aldaǵy jylǵa arnalǵan jumys jospary da aıqyndaldy.

Partıanyń baspasóz qyzmetiniń habarlaýynsha, keńestiń basty mindeti – aýyl sharýashylyǵy salasyndaǵy saılaýaldy ýádelerdiń iske asyrylýyn baqylaý. Búginde azyq-túlik baǵasynyń qymbattaýy óte ózekti bolyp otyr. «Nur Otan» partıasynyń Hatshysy Marat Sembekov atap ótkendeı, ótken jyly qant pen ósimdik maıynyń baǵasy 34-36%-ke, jarmalar – 29%-ke, kókónister men jemister – 15-20%-ke ósti.

Ol partıa jańa Keńesiniń múshelerine ýákiletti organdarmen birlesip, «Nur Otan» partıasynyń saılaýaldy baǵdarlamasynda kózdelgen óndiris qýatyn arttyrý, et-sút fermalaryn, qus fabrıkalaryn, jylyjaılardy salý jáne jańǵyrtý, egis alqaptaryn keńeıtý esebinen aýyl sharýashylyǵy ınfraqurylymyn damytý máselelerin qaraýdy usyndy.

Keńes múshesi Iaralı Halılov agroónerkásip salasynda obektıvti statısıkanyń joqtyǵyn alǵa tartty. Ol sońǵy 5 jylda aýyl sharýashylyǵy ónimderi óndirisiniń aıtarlyqtaı ósýi baıqalǵanmen, alaıda ımporttyń odan da óse túskenin atap ótti. Máselen, 2015 jyly ımport kórsetkishi 3,4 mlrd. AQSH dollaryn qurasa, ótken jyly 4 mlrd, AQSH dollarynan asqan.

«Osyǵan baılanysty keıbir statısıkada kórsetilgen derekter shyndyqqa janaspaýy ábden múmkin», - degen Iaralı Halılov.óz kúmánin jetkizdi.

Keńes múshesi Sergeı Zvolskıı azyq-túlik baǵasynyń ósýine toqtaldy. Onyń aıtýynsha, Petropavlda 1 keli kartoptyń baǵasy 400 teńgeden asqan. Sonymen qatar, ol ósimdik sharýashylyǵyndaǵy qıyndyqtarǵa da toqtaldy.

«Sýarý jaǵy qıyndyq týdyrǵandyqtan, baǵbandarǵa baý-baqsha kútimimen aınalysý múmkin bolmaı tur. Kókónis ósirýge daıyn kásiporyndar bar, alaıda taǵy da sý tapshylyǵy kedergi keltirýde. Elektr qýatynyń jaǵdaıy da máz emes. Biz elektr qýatyn alatyn balama kózderdi qarastyrýymyz kerek. Sebebi qazir elektr energıasynyń baǵasy aspandap ketti»,- dedi Sergeı Zvolskıı.

Óz kezeginde Keńes múshesi Serik Temirhanov agroónerkásiptik keshendi damytýdyń memlekettik baǵdarlamasynda balyq sharýashylyǵynyń joqtyǵyn alǵa tartty.

Otyrys qorytyndysy boıynsha keńes músheleri aýyl sharýashylyǵynyń áleýmettik mańyzdylyǵyn eskere otyryp, aı saıyn agrarshylar kótergen máselelerdi qarap jáne ony sheshýge, sondaı-aq kelesi otyrysta aýyl sharýashylyǵy mınıstrligi basshylyǵynyń esebin tyńdaýǵa sheshim qabyldady.