Baýyrjan Baıbek pen Janbolat Mamaı sotta tatýlasa almady. Bul týraly Baıbektiń ókili Aıjan Táshenova aıtty.

«Búgin sot tatýlastyrý rásimi aıasynda B.Baıbektiń J.Mamaı men I.Imanbaevaǵa qatysty talap aryzy boıynsha jaýapkerlerdiń qatysýymen onlaın-áńgimelesý ótkizdi.

Zańǵa sáıkes medıasıa – azamattyq proses aıasynda ótkizilýi mindetti talap aryz óndirisiniń ajyramas bóligi ekendigin atap ótkim keledi. Bul talap Azamattyq is júrgizý kodeksiniń 150 jáne 174-baptarynda belgilengen. Iaǵnı, sottyń ózi tatýlastyrý rásimin uıymdastyrady jáne taraptarǵa daýdy sheshýge múmkindik beredi.

Áńgimelesý barysynda sýdıa A.Ótepova osy rásimniń eriktiligin atap ótip, taraptarǵa daýdy tatýlasý arqyly sheshý quqyǵyn túsindirdi.

Tatýlasý múmkindigi men sharttary týraly bizdiń ustanymymyzdy men keshegi postta aıtqan bolatynmyn. Sotta men talaptarymyzdy rastadym.

J. Mamaı óz sózinde aldyndaǵy negizsiz aqparat taratatyn barlyq materıaldaryndaǵydaı, sot talqylaýyna qatysy joq máseleler boıynsha áńgime júrgizýge tyrysyp, talap aryzda málimdelgen jáıtterge janaspaıtyn basqa dúnıelerdi aıtyp ketti. Jaýapkerler tatýlasýdan bas tartty.
Konstrýktıvti dıalogtyń bolmaýyna, sondaı-aq jaýapkerlerdiń tatýlasý boıynsha usynylǵan sharttardan bas tartýyna baılanysty sýdıa A.Ótepova áńgimelesýdi toqtatý týraly sheshim qabyldady.

Taǵy da esterińizge sala keteıin, sot – jalań málimdemeler jasap, ásiresaıasatshyldyqpen aınalysyp, dolbarlar aıtýǵa arnalǵan minber emes. Sotta taraptar málimdemelerin rastaıtyn dáleldemelerdi mindetti túrde usyna otyryp, tek daýdyń mánine qatysy bar jaǵdaıattar týraly ǵana túsinikteme berýge quqyly.

Budan ári Azamattyq is júrgizý kodeksine sáıkes talap aryz berilgen kúnnen bastap 10 jumys kúni ishinde, ıaǵnı 30 sáýirden bastap sot talap aryzdy máni boıynsha qaraý úshin óndiriske qabyldaý týraly sheshim qabyldaıdy.

Jurtshylyqty istiń barysy týraly ári qaraı da obektıvti túrde habardar etip otyramyn», - dep jazdy zańger.