Memleket basshysy Qazaqstan halqyna Joldaýynda mal sharýashylyǵy men agrarlyq salada mańyzdy mindetter belgiledi. Aýyl sharýashylyǵy salasynyń basty mindeti – elimizdi negizgi azyq-túlik ónimimen tolyq qamtamasyz etý ekendigin basa aıtty.

Bul baǵytta Shymkentte 2 agroındýstrıaldy aımaqtyń qurylysy bastaldy. Onyń biri aýylsharýashylyq ónimderin tereń óńdeýde «Bozaryq» tamaq ónerkásibi ındýstrıaldy aımaǵy qurylyp, quny 23 mlrd. teńgeni quraıtyn 1 810 jumys ornymen 21 joba iske asady.

Ekinshi aımaqta 136 gektarǵa zamanaýı ónerkásiptik jylyjaı̆ keshenderi salynady. Munda 30 mlrd. teńgege 2 000 jumys ornymen 20 joba júzege asatyn bolady.

Aktıv otyrysynda qala ákimi Murat Áıtenov agrarlyq ındýstrıany jolǵa qoıýda keshendi jumystardy jalǵastyrý qajet ekendigin aıtty. Qalalyq aýylsharýashylyǵy jáne veterınarıa basqarmasyna mal jaıylymdyq jerlerge taldaý júrgizip, mal basynyń saýlyǵyn, ónimdiligin arttyrýda júıeli jumystar atqarýdy tapsyrdy. Sonymen birge, Sıfrlandyrý basqarmasymen birge veterınarıa salasyn avtomattandyrý prosesin zerdeleýdi júktedi.

Sonymken qatar, Prezıdent sıfrlandyrý jónindegi ulttyq jobanyń aıasynda keminde 100 myń joǵary bilikti İT-maman daıarlaýdy tapsyrdy. Osyǵan oraı Shymkent qalasynyń ákimi óziniń orynbasarlaryna bilim berý uıymdaryndaǵy STEM kabınetteriniń tıimdi jumys isteýin qadaǵalaýdy, İT-mamandar daıarlaýdyń qalalyq keshendi josparyn ázirleýdi júktedi.

Aıta keteıik, memlekettik organdardyń aqparattyq júıeleriniń ózara tıimdi kiriktirilýin sheshý maqsatynda geoportal júıesin bekitilgen merzimde iske qosýdy tapsyrdy. Nátıjesinde jer qatynastary, sáýlet, qala qurylysy, ınjenerlik jeliler salalary boıynsha júıeli aqparattyq derekter qalyptastyrylyp, kórsetiletin memlekettik qyzmetter tolyq avtomattandyrylatyn bolady.

Memleket basshysy ınflásıa deńgeıin 6-4 paıyzdyq dálizde ustap turý jóninde talap qoıdy. Baǵa turaqtylyǵyn saqtaýda kóterme úılestirý jelisin quryp, usaq aýyl sharýashylyǵy taýar óndirýshilerdi sol jelimen qamtamasyz etýdi júktedi.
Shymkentte bul baǵytta baǵa turaqtylyǵyna qol jetkizýde áleýmettik mańyzy bar azyq-túlik taýarlarynyń 19 pozısıasy boıynsha iri azyq-túlik saýda jelilerimen kelisim jasalǵan. Saýda ortalyqtaryna qaıtarymdy shartpen qarjy berip, áleýmettik 19 túrli azyq-túlik taýary shekti baǵamen satylýda.

Shahar basshysy M.Áıtenov osy maqsatqa bólinetin qarjyny jyl saıyn ulǵaıtatyn bolamyz dedi. Orynbasaryna aýyl sharýashylyǵy taýar óndirýshileriniń kóterme jelilermen deldalsyz jumys isteýin úılestirý jóninde sharalar qabyldaýdy, kásipkerlik jáne óńdeý ónerkásibi salalaryndaǵy jumystardy úılestirýdi júktedi.

Sonymken qatar, Prezıdent Joldaýynda elimizde vaksına qory jetkilikti, azamattarymyzdyń tańdaý múmkindigi bar ekeni aıtyldy. Vaksına jóninde túrli qaýeset taratýshy azamattar, ózderi adasqanymen qoımaı, jurtty adastyryp otyrǵanyna nazar aýdaryldy.

«Halyq densaýlyǵyn saqtaýda indetke qarsy vaksına salý jalǵasady. Bul baǵytta júıeli aqparat jumystaryn jalǵastyrýymyz qajet. Qalanyń densaýlyq saqtaý salasyn turaqty ekpe alý júıesine daıyndaýymyz kerek» - dedi Shymkent ákimi qala aktıviniń otyrysynda.

Halyqtyń jalpy aýrýshańdyq kórsetkishin nasharlatyp almaý úshin josparly skrınıngter, standartty ekpeler merzimderinde atqarylýy tıis ekendigin aıtty. İndetpen kúreske tikeleı qatyspaıtyn medısına personaly josparly jumystaryn atqaryp, profılaktıkalyq sharalarǵa basymdyq berýin qamtamasyz etý jóninde Densaýlyq saqtaý basqarmasyna tapsyrma berdi.

Otandyq dári-dármek pen qural-jabdyqtyń úlesin arttyrý maqsatynda qaladaǵy medısına ónimderin óndiretin kásiporyndardyń óndiristik áleýetin zerdelep, keshendi jospar ázirleýdi qalalyq kásipkerlik jáne ındýstrıaldy-ınnovasıalyq damý basqarmasyna júktedi.