Demokratıalyq partıa qurý boıynsha yntaly top jetekshisi, saıası belsendi Janbolat Mamaı qylmystyq isti tergeý aıasynda 2 aıǵa qamaýǵa alyndy.

Belsendiniń ústinen "Polısıany qorlady, jalǵan málimet taratty" degen aıyptar boıynsha qylmystyq is qozǵalǵan.

Belsendiniń áıeli, jýrnalıs, quqyqqorǵaýshy Inga Imanbaı prokýror Janbolat Mamaıdy 2 aıǵa qamaýdy surap otyrǵanyn aıtqan. Belsendini qoldaý úshin Almaty qalasy polısıa departamentine barǵan onyń jaqtastary Janbolat Mamaıdy bosatpasa, ashtyq jarıalaıtyndaryn málim etken.

Qańtar oqıǵasy qurbandaryn eske alý mıtıńine qatysqany úshin beıbit jıyn ótkizý tártibin buzdy degen aıyppen 15 táýlik qamaýda bolǵan belsendi ákimshilik jaza merzimi aıaqtalar shaqta taǵy 48 saǵatqa qamaýǵa alynǵan. Ol 12 naýryz kúni abaqtydan jazǵan hatynda qylmysqa barmaǵanyn aıtqan.

"Qadirli aǵaıyn! Meni saıası sebeptermen, saıası qýdalaýdyń nátıjesinde qamaýǵa aldy. Polısıany qorlady, jalǵan málimet taratty dep. Eshqandaı qylmys jasaǵan joqpyn. Óz kinámdi moıyndamaımyn. Bizdiń jolymyz aq, adal. Qoldaý kórsetken barsha aǵaıynǵa alǵys aıtamyn. Halyqaralyq uıymdar qoldaý kórsetýi kerek dep sanaımyn. Birge jeńemiz!" delingen hatta.

"Janbolatqa qatysty ákimshilik jazanyń sońyn qylmystyq iske almastyrýdyń amalynan eki boljam jasaýǵa bolady:

Birinshiden, bıylǵy jaz-kúz maýsymynda merziminen buryn parlamenttik saılaý ótýi múmkin;
qylmystyq jaýapkershilikke tartylǵan (eki aılyq tergeýden keıin, sot Mamaıǵa ary ketkende bostandyǵyn shekteý nemese shartty jaza beredi) azamat retinde Janbolat saılaýdan shettetiledi (qazirgi qoldanystaǵy saılaýǵa qatysty zańdylyqtarynyń talaby boıynsha);

Ekinshiden, prezıdent Toqaevtyń naýryz joldaýynan keıin, saılaý jáne saıası partıalar týraly zańdarǵa azdaǵan ózgerister engiziletin bolsa, bılikpen mámilelesýge kónbeıtin opozısıalyq saıasatker Janbolattyń Dempartıasyn saılaýǵa deıin "qaǵyp tastap", tirkeýden ótkizbeýdiń áreketi jasalýda" deıdi jýrnalıs.