Eńbek jáne halyqty áleýmettik qorǵaý mınıstrligi Elektrondyq eńbek bırjasyndaǵy  tamyz aıy boıynsha qalyptasqan ahýaldy jarıalady.

Mınıstrlik málimetinshe, elektrondyq eńbek bırjasynda tamyzda 119,9 myń bos jumys orny jáne 93,9 myń túıindeme jarıalanǵan.

Tamyz aıynda bos jumys oryndarynyń basym kópshiligi bilim berý salasynda baıqalǵan. Oǵan jańa oqý jyly áser etken. Bos jumys oryndary kóp salalar qataryna qurylys jáne aýyl sharýashylyǵy kásiporyndary kirgen..

Usynylatyn ári kútiletin jalaqy mólsheri óńirler men mamandyqtar boıynsha ártúrli. Atyraý oblysynda eń joǵary eńbekaqy usynylǵan. Onda 824 myń teńge jalaqy alatyn 20 ónerkásiptik álpınıske vakansıa jarıalanǵan.

Nur-Sultan jáne Almaty qalalarynda, Almaty jáne Shyǵys Qazaqstan oblystarynda jumys berýshiler memlekettik organdardaǵy qurylymdyq bólimshelerdiń basshylaryna 500 myńnan 730 myń teńgege deıin jalaqy usynǵan.

Ǵylymı qyzmetkerler ortasha eseppen ózderin  2,7 mln teńge, bas dırektorlar 2,3 mln teńge, avıasıa ınjenerleri 1,6 mln teńge, kenish dırektorlary 1,5 mln teńge jáne qosymshalardy ázirleýshiler 1,2 mln teńge jalaqyǵa laıyqty dep sanaıdy.

Al jumys berýshiler memlekettik uıymdardyń basshylaryna 640 myń teńge, bas tehnologtar men qarjylyq rıskter menedjerlerine 500 myń teńge jalaqy usynýǵa ázir.