Toqaev jańa Salyq kodeksine qodeksine qol qoıdy

/uploads/thumbnail/20250718164547204_big.webp

Qasym-Jomart Toqaev jańa Salyq kodeksine qol qoıdy, dep habarlady Aqorda.

Kodeks boıynsha salyqtardyń sany 20 paıyzǵa azaıady, al jeńildikter men alymdar ońtaılandyrylady.

Máselen, biryńǵaı jer salyǵy qysqartyldy, jeke tólemaqylar boıynsha mólsherlemeler men alymdardyń sany azaıtyldy.

Kodekstiń negizgi jańalyqtary:

  • qosylǵan qun salyǵy boıynsha mindetti esepke qoıý úshin aınalymnyń tómengi shegi 10 myń aılyq eseptik kórsetkishke (40 mıllıon teńge) deıin tómendetiledi;
  • qosylǵan qun salyǵynyń jańa bazalyq mólsherlemesi - 16 paıyz;
  • dári-dármek pen medısınalyq qyzmetterge tómendetilgen QQS mólsherlemesi belgilendi (2026 jyldan – 5 paıyz, 2027 jyldan – 10 paıyz);
  • merzimdi baspa basylymdardy ótkizý boıynsha qosylǵan qun salyǵy 10 paıyz.

Al tegin medısınalyq kómektiń kepildik berilgen kólemi men mindetti áleýmettik medısınalyq saqtandyrý aıasyndaǵy qyzmetter, orfandyq jáne áleýmettik máni bar aýrýlardy emdeý, sondaı-aq, baspa túrindegi kitap shyǵarý, arheologıalyq jumys júrgizý qyzmetteri qosylǵan qun salyǵynan bosatylady.

"Biryńǵaı zeınetaqy jınaqtaýshy qorynan tólenetin zeınetaqy tólemderi jeke tabys salyǵynan bosatylady. Paıdalanylý merzimi 10 jyldan joǵary avtomobılder úshin kólik salyǵy tómendetildi. Múgedektigi bar adamdarǵa áleýmettik salyqtyq shegerimder 882-den 5000 AEK-ke deıin ulǵaıtyldy", - delingen resmı habarlamada.

Arnaýly salyq rejımderi ońtaılandyryldy. Ony tek ózin-ózi jumyspen qamtyǵandar, ońaılatylǵan deklarasıa negizinde jumys isteıtinder jáne sharýa qojalyqtary qoldana alady.

Ózin-ózi jumyspen qamtyǵandar tólemderdi mobıldik qosymsha arqyly eseptep, tóleı alady.

Baılyqqa salynatyn salyq artady

Aldaǵy ýaqytta jeke tabys salyǵynyń progresıvti mólsherlemesi engiziledi. Oǵan sáıkes, jyldyq jalpy tabysy 8 500 aılyq eseptik kórsetkishten (2025 jylda – 33,4 mln teńgeden) asatyn azamattarǵa 15 paıyz salyq mólsherlemesi qoldanylady.

"Sol sıaqty dıvıdentteri men tabys kólemi jylyna 230 myń AEK-ten asatyn kásipkerler osyndaı mólsherde salyq tóleıdi. Al fermerlerdiń osy mejeden asatyn tabysyna burynnan saqtalǵan 70 paıyz jeńildikti esepke ala otyryp, 4,5 paıyz salyq salynady", - delingen zańda.

Budan bólek, 10 paıyz aksız túrinde salyq qymbat ónimderge salynady.

Olar:

  • quny 75 mıllıon teńgeden asatyn avtokólikter;
  • quny 100 mıllıon teńgeden asatyn kemeler;
  • ár lıtriniń quny 500 myń teńgeden asatyn alkogól;
  • ár danasynyń quny 10 myń teńgeden asatyn temeki ónimderi;

Sonymen qatar jalpy quny 450 mıllıon teńgeden asatyn jyljymaıtyn múlik nysandaryna múlik salyǵy joǵarylaıdy.

Korporatıvtik tabys salyǵy ne bolady?

Korporatıvtik tabys salyǵy 20 paıyz deńgeıinde saqtalady. Alaıda saralanǵan salyqtyq mólsherleme engiziledi:

  • bankter (bıznes sýbektilerin kredıtteýdi qospaǵanda) men oıyn bıznesi úshin – 25 paıyz; áleýmettik sala uıymdary úshin 2026 jyly - 5 paıyz, 2027 jyly 10 paıyz;
  • aýyl sharýashylyǵy taýaryn óndirýshilerge 3 paıyz jeńildetilgen mólsherleme qalady.

Al qor naryǵyn yntalandyrý úshin bırjalyq qundy qaǵazdarǵa tólenetin dıvıdentterge salyq jeńildikteri sol kúıi saqtalady. "Báıterek" holdıńi shyǵarǵan qundy qaǵazdardan túsetin kiris 2031 jylǵa deıin KTS-tan bosatylady. Al paıdaly qazbalardy óńdeý men geologıalyq barlaý salasynda tıimdiligi tómen jańa ýchaskeler 5 jylǵa paıdaly qazbalardy óndirý salyǵynan bosatylady. Kásipkerdiń salyq bereshegi az bolsa, esepshottary buǵattalmaıdy. Qaryz somasyna qaraı eskertý jáne basqa da sharalar kezeń-kezeńimen qoldanylady.

Jańa Salyq kodeksi 2026 jylǵy 1 qańtardan bastap kúshine enedi.

Qatysty Maqalalar