Memleket basshysy Qasym-Jomart Toqaev 2025 jyldy "Jumysshy mamandyqtar jyly" dep jarıalady. Bul bastama jumysshy mamandyqtarynyń mańyzdylyǵyn arttyrýǵa, jastardy osy salaǵa tartýǵa jáne eńbek naryǵynda suranysqa ıe mamandyqtar boıynsha bilikti kadrlardy daıarlaýǵa baǵyttalǵan.
Aımaǵymyzda jumysshy mamandyqtaryn dáripteý men jastardy eńbekke baýlý maqsatynda Mańǵystaý oblysynyń ákimi Nurdáýlet Qılybaı óńir jastarymen ashyq formatta kezdesý ótkizdi. Jıynda jastar óz usynys-pikirlerin ortaǵa salyp, aımaq basshysyna tikeleı saýaldaryn qoıýǵa múmkindik aldy.
Kezdesýge oblys ákiminiń orynbasarlary, túrli salada tabysqa jetken el azamattary qatysyp,tájirıbelerimen bólisip, jastarǵa baǵyt-baǵdar berer keńesterin aıtty.
Úsh saǵatqa jýyq sozylǵan basqosýǵa oblystyń ár aımaǵynan kelgen 500-ge jýyq jas qatysty. Onyń ishinde túrli salada eńbek etip júrgen mamandar, joǵary jáne arnaýly orta oqý oryndarynyń stýdentteri, «Jasyl El» eńbek jasaǵy men jastar uıymdarynyń músheleri bar.
Erkin ári mazmundy formatta ótken júzdesýde aımaq basshysy ómirlik tájirıbesimen bólisip, jetistikke jetý jolyndaǵy tabandylyq pen iske adaldyqtyń mańyzdylyǵyn atap ótti.
- Qazirgi tańda jastardyń basym bóligi munaı salasynda jumys isteýdi qalaıdy. Bul salada bos jumys oryndary shekteýli. Qoǵamda úlken jetistikke jetken azamattardyń eshqaısysy birden munaıdan bastaǵan joq. Barlyǵy qarapaıym qyzmetten bastady. Mamandyqqa degen adaldyq, eńbekqorlyq pen tózimdilik – kez kelgen salada jetistikke jetýdiń basty sharty. Búginde bizdiń óńirge kórshiles shet elderden myńdaǵan adam kelip jumys isteıdi. Olardyń sany oblystaǵy jumyssyzdar sanynan áldeqaıda kóp. Eńbek etemin degen janǵa jumys bar. Eshteńeden qoryqpaı, durys mamandyq tańdap, el ıgiligi úshin eńbek etińizder. Sonda nátıjesi bolady, - dedi Nurdáýlet Qılybaı.
Kezdesýde jastar óz ıdeıalary men bastamalaryn ortaǵa salyp, túrli áleýmettik jobalarǵa qatysýǵa nıetti ekenin bildirdi. Ákim olardyń usynystaryn nazarǵa alyp, keıbir bastamalardy qoldaýǵa daıyn ekenin aıtty.
Aıta keteıik, búginde Mańǵystaý oblysynda 14 pen 35 jas aralyǵyndaǵy 240 myńnan asa jas bar. Jastar saıasatyn júzege asyrýda óńirde 7 jastar resýrstyq ortalyǵy jumys isteıdi. Sonymen qatar, 26 kásiporynda jas mamandar keńesteri qurylǵan.
Mańǵystaý oblysy ákiminiń baspasóz qyzmeti
