Depýtat Dınara Zakıeva qazaqstandyq 6 mln 750 myń otbasynyń jartysyna jýyǵyna qoldaý qajettigin aıtyp Qarjy mınıstri Erulan Jamaýbaevqa depýtattyq saýal joldady.

Depýtattyń sózinshe, 1 145 100 otbasy daǵdarys jaǵdaıynda turyp jatsa, 1 592 600 otbasy óte qıyn jaǵdaıda.  

"Atalǵan sanattaǵy barlyq otbasyǵa keshendi kómek, áleýmettik ońaltý, súıemeldeý, jumysqa ornalasýǵa kómek kórsetý, qujattandyrý, járdemaqylar, tólemder, AÁK jáne basqa da qyzmetter qajet. Sondyqtan barlyq qyzmetti bir terezede alýdy qamtamasyz etý úshin elimizdiń ár aýdanynda ınfraqurylym, atap aıtqanda, Otbasyn qoldaý ortalyqtaryn qurý qajet. Qazir elde 220 aýdanǵa tek 47 Otbasyn qoldaý ortalyǵy bar. Mysaly, Túrkistan oblysynda 14 aýdan men úsh qala, 2 mıllıonnan astam halyq bar. 330 myń otbasy tótenshe qıyn jáne daǵdarysty ómirlik jaǵdaıda turady, oblysta zorlyq-zombylyq deńgeıi de joǵary. Oblys boıynsha tek eki daǵdarys ortalyǵy bar, bir Otbasyn qoldaý ortalyǵy endi ashylyp jatyr. Úsheýi de Túrkistan qalasynda ornalasqan. Qıyn ómirlik jaǵdaıǵa tap bolǵan otbasynyń, balaly áıeldiń shalǵaıda jatqan aýyldan ortalyq izdep júzdegen kılometr júrip baratyn ne kúshi, ne qarjylyq múmkindigi joq. Respýblıkanyń basqa óńirleri boıynsha da osyndaı jaǵdaı. Ókinishke qaraı otbasylardyń áleýmettik máseleleriniń sheshilmeýi jáne olarǵa ýaqtyly kómek kórsetý múmkindiginiń bolmaýy kóp jaǵdaıda qaıǵyly saldarǵa ákelip júr. Mundaı mysaldar bizde jetkilikti" delingen depýtattyń saýalda.

Dınara Zakıevanyń aıtýynsha, ashylýy 2022 jylǵa josparlanǵan 45 ortalyqtyń búginde 21-i ashylǵan, taǵy 19 ortalyq jyldyń sońyna deıin ashylmaq.

"2023-2025 jyldar aralyǵynda taǵy 158 ortalyq ashý qajet. Bul jergilikti búdjetter esebinen boljanǵan edi. Alaıda atalǵan ortalyqtardy ashý úshin óńirlerde qarajat joq. Osyǵan baılanysty osyndaı áleýmettik mańyzy bar baǵytty tolyqqandy iske asyrý úshin 2023-2025 jyldary ortalyqtar qurýǵa ortalyqtandyrylǵan qarjylandyrýdy qarastyrýdy suraımyz" deıdi depýtat.