Elordany qaıta qurý boıynsha aýqymdy jumystar «Astana – jaıly qala» master-jospary aıasynda júrgizildi. Qalanyń turǵyndary men qonaqtary úshin bos ýaqytyn tıimdi ári densaýlyǵyna paıdaly ótkizýge jańa tartymdy oryndar ashyldy.

Sońǵy jyldary elordada 900-den astam aýla men qoǵamdyq keńistik abattandyryldy. Onyń ishinde kópir asty keńistikter, «Teatr» býlvary («Jastar» saraıynan Mýzykalyq jas kórer­men teatryna deıin), «Demalys promenade», qutqarýshylardyń, muǵalimderdiń, medısına qyzmetkerleriniń qurmetine arnalǵan gúlzarlar, kóshe sporty kolızeıi bar.

Sonymen qatar «Beıbitshilik jáne kelisim saraıy» aýmaǵynda amfıteatr, qalanyń oń jaǵalaýynda taǵy bir jaıaý júrginshiler joly, «Vstrecha» saýda úıi janyndaǵy qoǵamdyq keńistik, «Beıbitshilik jáne kelisim» saıabaǵy, qalalyq alań, jelekjoldar salyndy.

Abattandyrý kezinde eldi mekenderge erekshe nazar aýdarylady. Eldi mekenderdiń ózinde 300-ge jýyq aýla men qoǵamdyq keńistik abattandyrylyp, Kóktal aýmaǵynda 16 gektardy alyp jatqan saıabaq kópshilikke usynyldy.

Qoǵamdyq keńistikter men aýla aýmaqtarynda árkim óz qalaýy boıynsha serýendeı alady. Qala turǵyndaryna basketbol, fýtbol alańdary, workout-aımaqtar, átkenshekterde demalyp, shyǵarmashylyq talantyn pash etýge arnalǵan sahnalarda ózgelerdiń ónerlerin tamashalaý múmkindik beriledi.

2023 jyly «Úrker», «Telman» eldi mekenderindegi, Sh.Aıtmatov kóshesindegi, J.Táshenov jáne T.Hýseın kósheleriniń qıylysyndaǵy, Abaı dańǵylynda gúlzarlardy abattandyrý josparlanyp otyr. Sol sıaqty Kúıshi Dına kóshesinen Mustafın kóshesine deıin, Júrgenov kóshesi, 28/1, Qoshqarbaev kóshesi, 45, Qordaı jáne Taıqazan kósheleriniń qıylysynda, K.Ázirbaev kóshesi, 10-14 jáne t.b. Abylaıhan dańǵylynyń boıynda saıabaqtar bolady. Kishi Taldykólde ekopark salynady. Ekopark jobasy aýmaqty abattandyrýdy, sý balansyn saqtaı jáne tolyqtyra otyryp, rekreasıalyq aımaq qurýdy kózdeıdi.

Bas qaladaǵy kúrmeýi qıyn ózekti máseleniń biri – kóp jyldan beri qurylysy turalap qalǵan turǵyn úıler. Sońǵy ýaqytta úıli bolýdy armandap júrgen úleskerlerdiń úmiti aqtalyp, túıtkildiń túıini tarqap kele jatyr. Bıyldyń ózinde astanalyq úlesker otbasylardyń 90%-ǵa jýyǵynyń máselesi sheshildi.

Jyl sońyna qaraı úleskerler sany shamamen 16 myńnan 2 myń otbasyǵa deıin qysqarady. Máselen, 2019 jyldyń jazynda qurylysy uzaqqa sozylǵan 150 kóppáterli turǵyn úı bolsa, búginge deıin olardyń 120-nyń máselesi sheshildi. Qurylysy uzaqqa sozylǵan qalǵan 30 úı boıynsha qadamdyq is-sharalar jospary bar. Onda 2 myńǵa jýyq otbasy baspanasyn kútip júr.

Qurylysy turalap qalǵan turǵyn úı máselesin sheshý – Memleket basshysynyń tikeleı baqylaýynda. Mundaı úılerdiń birinde ádette tek shuńqyry ǵana qazylǵan, endi birinde qarjylyq aýdıt, jobalyq-smetalyq sekildi qujattamasy joq edi, sol sıaqty bir páterdi eki-úsh otbasyǵa satqan jaıttar da boldy, taǵy birinde qańqasy turǵyzylǵan úı apatty kúıde boldy.

Mysaly, «Terıtorıa komforta-1» turǵyn úı kesheniniń qurylysy 2004 jyly bastaldy. Alaıda úıdi tehnıkalyq tekserý barysynda ǵımarattyń apatty jaǵdaıda ekeni belgili boldy. Burynǵy qurylys salýshy tehnıkalyq normalarǵa saı kelmeıtin beton markasyn qoldanyp, plıtalar arasynda sáıkestik bolmady. Qurylysshylardyń aıtýynsha, bul úı paıdalanýǵa berilgende uzaqqa barmaı qırap, turǵyndar úıindiniń astynda qalar edi. Osydan keıin onyń bloktary buzylyp, ornyna jańa turǵyn úı kesheni salyndy, nátıjesinde turǵyndar kópten kútken baspanasyna ıe boldy.

Derekkóz: Astana aqshamy