Bul joly burynǵy sheneýnik reıderlik shabýyl jasady dep aıyptalyp otyr, – dep Qamshy.kz aqparattyq agenttigi Tengrinews.kz saıtyna silteme jasap habarlaıdy.

Aıyptaýshy taraptyń málimetinshe, 2019 jyly Astanadaǵy «Diplomat» qonaq úı keshenine ıelik etetin kásipker K.-nyń tanysy Muhamedıulyna qarjylaı kómek surap júgingen. Muhamedıuly kásipkerge 2,5 mıllıard teńge berýge kelisken, biraq onyń ornyna odan JSHS jarǵylyq kapıtalynyń 71 paıyzyn enesine aýdarýdy suraǵan. Tergeý sol kezde sheneýniktiń basynda qonaqúıdi basyp alý jospary qalyptasqan dep esepteıdi.

Mámile jasalǵannan keıin sheneýnik qonaqúıge júıeli túrde kele bastady. Artynsha Muhamedıuly qonaqúı ıesine qalǵan 29 paıyzyn berýdi talap etken. Biraq ıesi bas tarqan. Budan keıin sheneýnik «Dıplomat» qyzmetkerlerine JSHS dırektoryn qonaqúıge kirgizbeý týraly buıryq berdi. Odan keıin seriktestikke qatysýshylardyń jalpy jınalysynyń hattamalary burmalanyp, onda seriktestik dırektory Muhamedıulymen úlestes tulǵamen aýystyrylǵan.

Arystanbek Muhamedıuly taǵylǵan aıyppen kelispeı, jábirlenýshini saıasatker Mark Iýnıýs Brýtqa, ózin Sezarǵa teńep jelpine sóıledi.

 «Biz Rım ımperıasynyń tarıhynan adamzat tarıhynda satqyndyq pen aramdyqtyń sımvoly retinde qalǵan Mark Iýnıı Brýttyń áreketin jaqsy bilemiz. Al Gaı Iýlıı Sezar Brýttyń sumdyǵyna qaramastan, tarıhta «Al sen, Brýt» sóziniń avtory bolyp qala bermek, – dep sot alqasyna qarata:  – «Avgıa patshanyń qorasyn kóńnen tazartqan ejelgi batyr Gerakl sıaqty siz de osy sot isindegi aramdyq pen ótirikten arylasyz dep senemin», - dedi Muhamedıuly sýdıaǵa.

Esterińizge sala keteıik, Astana qalasynyń qylmystyq ister jónindegi aýdanaralyq sotynyń úkimimen Arystanbek Muhamedıuly segiz jylǵa bas bostandyǵynan aıyryldy.

Buǵan deıin ol Astanadaǵy Ulttyq mýzeıdiń dırektory bolyp turǵan kezinde búdjet qarajatyn jymqyrdy degen aıyp taǵylǵan bolatyn. Atap aıtqanda, ol qyzmettik ókilettigin asyra paıdalanyp, «Altyn adamnyń álem mýzeıleri arqyly sherýi» halyqaralyq kórmesine, «Qazaqstannyń ulttyq kıeli nysandary men murajaı qorlaryn ulttyq fotogrammetrıalyq 3D skanerleý» jobalaryna bólingen qarajatty jymqyrdy degen kúdikke ilindi.

Keıin kúdikti retinde sottalǵan Arystanbek Muhamedıulynyń áıeli tanyldy. Sybaılas jemqorlyqqa qarsy qyzmet Arystanbek Muhamedıulynyń advokaty da ustalǵany týraly aqparatty rastady. Vedomstvo eks-mınıstrdiń qorǵaýshysy alaıaqtyq jáne para berýge shaqyrdy degen kúdikke ilingenin habarlady.