Tek jyl basynan beri qalanyń bes aýdanynda ǵımarattar men úılerdiń qasbetterinen dızaın kodyna saı kelmeıtin úsh myńnan astam jarnamalyq bılbordtar, mańdaıshalar men dóńgelekterdegi jarnamalar joıyldy.

Astanalyqtar mundaı ózgerister qalany zamanaýı jáne jaıly etedi dep sanaıdy.

«Men bizdiń qalanyń ádemi qalpy úshin qýanamyn, óıtkeni mańdaıshalardyń alynyp tastalýy, bir qalyptaǵy úlgi, úılerdi ǵana emes búkil qalany kóriktendiredi», - dep esepteıdi astanalyq Aıman Turdahınova.

«Jaqsy jumystar júrgizilýde, syrtqy túri retke keltirilýde. Bul óte durys dep sanaımyn», - dedi elorda turǵyny Nurman Rahımov.

Bes aýdan ákimdiginiń qyzmetkerleri zańsyz jáne sáıkes kelmeıtin jarnamanyń dızaın-kodyn túsindirý jáne bólshekteý boıynsha turaqty kóshpeli is-sharalar ótkizedi. Kásipkerlermen tıisti áńgimeler júrgiziledi, dızaın-kodqa sáıkes kelmeıtin mańdaıshalardy aýystyrý qajettiligi týraly býkletter beriledi.

Esterińizge sala keteıik, 2023 jyldyń qańtar aıynda Astanany damytý máseleleri jónindegi keńeste Prezıdent Qasym-Jomart Toqaev kóshe jarnamasyn ornalastyrýǵa qoıylatyn talaptardyń saqtalýyn baqylaýdy kúsheıtýdi tapsyrǵan bolatyn.