Olaı emes eken múldem. Ataǵy bar, aqshasy barlar men bıliktegi sheneýnikter de áıelderin sabap, óltirip jatyr. Máselen, «Nemolchı.Kz» qoǵamdyq qory aqshasy da, sheni de bolǵan burynǵy jáne qazirgi kúıeýleriniń qolynan qaza tapqan áıelderdiń tizimin teripti. 

Saltanat Quljaǵarova. Astana qalasyndaǵy beldi kásipkerdiń áıeli Symbat Quljaǵarova 29 jasynda 9-10 jeltoqsanǵa qaraǵan túni bıikten qulap, qaza boldy. Qyzdyń máıiti Nur-Sultandaǵy turǵyn úı kesheniniń birinen tabylǵan. Ol qaıtys bolarynan buryn 3 aı boıy jelidegi paraqshasyna kúıeýi balalaryn tartyp alý úshin kúshtep psıhıatrıalyq aýrýhanaǵa jatqyzǵanyn jazyp, kómek surap kelgen. Biraq oǵan kómektesetin eshkim tabylmaı, ol úıdiń terezesinen sekirip ketken. Onyń ólimine kúıeýi sebep bolǵany týraly jańalyqtarda taraǵan.

Aınagúl Haırýllına. Oral qalasynyń eks-sheneýnigi Baýyrjan Haırýllın burynǵy áıeli Aınagúl Haırýllınany 18 jerden pyshaqtap, óltirip tastaǵan. Qany sorǵalaǵan Aınagúl Haırýllına polısıa kóliginde kóz jumdy. Nekede turǵan jyldary kúıeýi Aınagúldi soqqyǵa jyǵyp, kún kórsetpeıtin bolǵan desedi. Baýyrjan Haırýllın 15 jylǵa bas bostandyǵynan aıyryldy.

Ajar Shadıeva. Onyń kúıeýi Rýslan Otarbaev sheneýnik, Amanat partıasynyń múshesi, ózi áıelderdi zorlyq-zombylyqtan qorǵaý komıteti basshysynyń uly bola tura, áıelin aıaýsyz soqqyǵa jyǵyp óltirgen. Qaıǵyly oqıǵaǵa 15 polısıa qyzmetkeri, dostary, týystary kýá bolǵan. Bul qylmysy úshin Rýslan Otarbaev 12 jylǵa túrmege qamaldy.

Aıman Asanova. Byltyr zańger Aıman Asanovany burynǵy kúıeýi Talǵat Nurtaev 18 jerinen pyshaqtap óltirgen. Alaıda Almaty qalasynyń qylmystyq ister jónindegi mamandandyrylǵan aýdanaralyq sotynyń sýdıasy Erkin Maıshınovtyń tóraǵalyǵymen qaza tapqan adamnyń burynǵy kúıeýi Talǵat Nurtaev eń tómengi qaýipsizdik qylmystyq - atqarý júıesi mekemesinde 1,5 jylǵa ǵana bas bostandyǵynan aıyrý jazasyna kesilgen.

eń tómengi qaýipsizdik qylmystyq - atqarý júıesi mekemesinde 1,5 jylǵa ǵana bas bostandyǵynan aıyrý jazasyna kesilgen

Saltanat Núkenovany eks-mınıstr Qýandyq Bıshimbaev Astanadaǵy óziniń «Bau» meıramhanasynda soqqyǵa jyǵyp, óltirip qoıdy. Marqumnyń týystary buǵan deıin de Bıshimbaevtyń áıeline birneshe ret qol kótergenin aıtady.

Elimizde bir kezderi betkeustar sheneýnikterimizdiń biri bolǵan Bıshimbaev áıelin óltirip jatsa, taǵy talaıy áıelinen balalaryn tartyp alyp, kún kórsetpeı júr. Toqaevtyń keńesshisi bolǵan, eki beti tompıǵan Oljas Qudaıbergenov deıtin ekonomıs bar. Jurttyń aldyna shyǵyp alyp, aqyl soqqanda aldyna jan salmaıdy. Sóıtsek, ol úıinde áıeli Móldir Qabylovanyń qanyn qasyqtap ishetin esýastyń ózi eken. Beıshara áıeli kúıeýinen zábir kórgenin aıtyp, Qasym-Jomart Toqaevtan kómek suraýǵa májbúr boldy. Onyń aıtýynsha, kúıeýi oǵan jáne balalaryna zorlyq-zombylyq kóresetip kelgen. Toqaevtyń keńesshisi bolyp, aıdarynan jel esken Oljekeń áıelge arasha túsip, kómektespek bolǵan ákesi men aǵasyn da sottatyp jibergen desedi.

Az deseńiz, ánshi Altynaı Jorabaeva da burynǵy kúıeýi Sábıt Ábdihalyqovtan ábden jábir kórip, 4 qyzyn alyp, Astanaǵa bas saýǵalap qashyp ketken.

Joǵaryda tizilgender – kileń sheneýnikter, el aldynda júrgen aptal azamattar. Olar sóıtse, turmysyn túzeı almaı, qıynshylyqtan kózin ashpaıtyn qarapaıym halyqtan ne suraımyz?!