Saparbaı Arynov esimdi fızık-ǵalym kezinde 60-qa jýyq ǵylymı eńbek jazyp, talaı jasqa tálim bergen. Qazirgi ýaqytta Almatydaǵy qańǵybastar mekeninde turyp jatyr. Ǵalymdy ul-qyzy jalǵyz tastap ketken.

Jyǵylǵanǵa judyryq bolyp, bıyl ony bir top jigit uryp-soǵyp, tonap ketipti. Sóıtip, áleýmettik beıimdeý ortalyǵyna kelýden basqa amaly qalmaǵanyn aıtady.

Almatydaǵy belgili turaǵy joqtarǵa arnalǵan beıimdeý ortalyǵy. Túrli taǵdyrlar toǵysqan jer. Dál osy jerde 2 aıdan beri fızıka-matematıka ǵylymdarynyń kandıdaty Saparbaı Arynov ta turyp jatyr.

72-ge kelgen qarıa ózge qańǵybastardan erek. Ústi-basy muntazdaı taza. Ári qoly qalt etse kitapqa úńiletinin baıqadyq.

Sóıtsek, bildeı ǵalymdy ul-qyzy birneshe jyl buryn jalǵyz qaldyrypty. Sodan beri zıaly qaýym ókili páter jaldap, óz kúnin kórgen. Al, bıyl bir top jigittiń shabýylyna tap bolyp, qańǵybastar mekenine kelýge májbúr bolǵanyn aıtady.

 «5 bala jabylyp, ámıanymdy alyp ketti. Onyń ishinde aqsha, qujattarym bar edi», - deıdi fızıka-matematıka ǵylymdarynyń kandıdaty Saparbaı Arynov.

 Munda oǵan tıisti em-dom jasalǵan. Qazir densaýlyǵy qalpyna kelgendeı. Qarıa kezinde ıadrolyq fızıka ınstıtýtynda jemisti eńbek etipti.Tipti zerthana meńgerýshisi qyzmetine deıin kóterilgen. 60-qa tarta ǵylymı eńbegi bar. Mektep oqýshylary men stýdentterge sabaq ta bergen. Ótken ómirin saǵynyshpen eske alǵan ǵalym qazir de qarap jatqan joq.

Saparbaı Arynovtyń elimizdegi fızıka ǵylymynyń damýyna zor úles qosqanyn burynǵy áriptesteri de rastady. Ári onsyzda fızıkter azda onyń qańǵybastar mekeninde turyp jatqanyna alańdaýly.

«Keńes odaǵyndaǵy belgili fızıkterdiń qataryna kiretin. Sondyqtan ýaqytynda bizdiń ınstıtýtta istegende ol qomaqty úles qosty dep aıta alamyn», - deıdi Iadrolyq fızıka ınstıtýty bas dırektorynyń orynbasary Nasyrolla Búrtebaev.

Qańǵybasqa aınalǵan fızık qazir avtorlyq kitabyn jazyp jatyr. Dese de, munda ǵylymmen aınalysý úshin qolaıly jaǵdaı joq. Sondyqtan, ózi qarttar úıine aýysqysy keledi. Biraq, ol ázirge múmkin bolmaı tur.

 «Qarttar úıine barǵysy keledi. Al, qarttar úıine barý úshin onyń balalary zań túrinde bas tartýy kerek. Qaramaımyz, baqpaımyz deýi tıis. Sol kezde ǵana biz ony qarttar úıine tapsyra alamyz», - deıdi Almaty qalalyq áleýmettik beıimdeý ortalyǵy dırektorynyń orynbasary Qazbek Jylqybekov.

 Dese de, qarıanyń 2 balasy ushty-kúıli joq. Ákesin izdep birde-bir ret kelmegen. Al, ǵalymnyń ózi munyń bárin synaq dep esepteıdi. Keler jyly qaıta ǵylym álemine oralyp, jastarǵa dáris berýdi de josparlap otyr.