Qamshy.kz aqparat agenttiginiń jetekshisi Bilál Qýanysh áleýmettik jelidegi paraqshasynda Nursultan Nazarbaevtyń Pýtınge ulttyń uly murasy sanalatyn qamshyny syılaýy - qaýipti nyshan ári úlken qatelik bolǵanyn jazady. 

Ol paraqshasynda "Qazaq baqtalasyna, bástalasyna, dushpanyna astyndaǵy atyn bersede, qolyndaǵy qamshysyn syılamas bolar edi. Eń jaqyn eki dostyń serttesýinde ǵana qamshy aýystyryp anttasatyn. Ulttyń uly murasy retinde qonaǵyńa, syılasyńa qamshy syılaý - árıne, quptarlyq. Al eldiń kóshin bastaǵan kósemniń izbasarynan basqaǵa óz qolymen qamshyny berýi - qaýipti nyshan. 2018 jyly sol kezdegi Prezıdent Nursultan Nazarbaev Pýtınge altynmen aptalǵan, kúmispen qaptalǵan qamshy syılap, bólinbes dostyǵyn pash etkendeı bolǵan. Araǵa jyl salmaı, bıliginen aıyryldy. Keıinirek «anttasqan andasy» Pýtınge barǵanda, qurmetten qaǵylyp, Lýkashenkonyń qoltyǵynda ketkenin kózimiz kórdi. Kóp ótpeı «burq» ete qalǵan “Qańtar oqıǵasy”Elbasy áýletine qamshy bop tıdi. Qamshy – bılik, qamshy – des, qamshy – namys. Sen qansha dos kórip syılasań da, qas dushpan qamshyny ózińe silteıdi. 

Kesheli beri Nazarbaevtyń Pýtınge barǵany sóz bolyp jatyr. «Qara qytaı qaptap, sary orys ákeńdeı» kórinse de, Táýelsizdigimizdi tárk etip, qıt etse Máskeýge mańyraıtyn qulaqkestilikten qashan qutylarmyz?! Bılik ustaǵandar «Ul bolsań qolyńda, qul bolsań tóbeńde oınaıtyn» Qamshynyń qasıetin túpsanasymen túsinse netti!.." dep jazady.