ORAL. QazAqparat - Samara qalasynda «Aqjol» qazaq ulttyq-mádenı avtonomıasynyń 10 jyldyǵyna arnalǵan mereıtoılyq sharalar ótip, oǵan Batys Qazaqstan oblysynyń delegasıasy da qatysyp qaıtty. 
Merekelik sharaǵa Reseıdiń jıyrmaǵa jýyq aımaǵynan, sondaı-aq Qazaqstannan Dúnıejúzi qazaqtary qaýymdastyǵy tóraǵasynyń birinshi orynbasary Talǵat Mamashev bastaǵan meımandar baryp, «aqjoldyqtardyń» qýanyshyn bólisti. Qaýymdastyqtyń qoldaýymen Reseı qazaqtarynyń kishi quryltaıy ótip, onda kórshi elde turatyn qandastarmen qarym-qatynasty odan ári jandandyrý, olardyń ulttyq salt-dástúri men mádenıetin, ana tilin joǵaltpaı, saqtaýyna qoldaý kórsetý baǵytynda pikir almasylyp, aldaǵy josparlar pysyqtaldy.

Osydan on jyl buryn qurylǵan «Aqjol» avtonomıasyna ultjandy azamat Toqtarbaı Dúısenbaev jetekshilik etedi. On jyl ishinde avtonomıa kóptegen tabystarǵa qol jetkizdi. Qazirgi kezde atalǵan uıymnyń Samaranyń on eki aýdanynda fılıaly, úsh ulttyq ansambli bar. Jyl saıyn kezekpen ár aýdanda Naýryz meıramy keńinen toılanyp keledi. Buryn ana tilinde sóıleýden qashqaqtaıtyn qandastarymyz birte-birte ult mádenıeti men ónerine, óz tiline bet burdy. T.Dúısenbaevtyń atap ótkenindeı, osy merzimde Batys Qazaqstan oblysy ákimdigi «Aqjol» avtonomıasyna qoldan kelgen kómegin aıaǵan joq. Qazaq tilin úıretý baǵytynda birlesken semınarlar uıymdastyrylyp, mamandar is-tájirıbelerimen bólisti. Sondaı-aq, qazaq jastary atajurtqa kelip, til syndyrsa, mádenıet mamandary Samaraǵa baryp, ondaǵylardy ulttyq án-kúı men bıge úıretti. Tipti sonda turaqtap qalǵandary da bar. Kórshiles óńirlerde turatyn baýyrlar ana tilindegi ádebı kitaptar, oqý-ádistemelik jınaqtarmen de qamtyldy.

Bul joly da óńir basshysy Nurlan Noǵaevtyń qoldaýymen barǵan batysqazaqstandyqtar atynan  BQO máslıhatynyń hatshysy Málik Qulshar «aqjoldyqtardy» quttyqtap, ıgi tilegin jetkizdi. Al Ǵ.Qurmanǵalıev atyndaǵy oblystyq fılarmonıa ártisteri óz ónerlerin kórsetip, merekeniń shyraıyn asha túsýge atsalysty.