Qara halyq qashanda zıaly qaýymǵa qarap, solardyń artynan eredi. Ótken ǵasyrlarda batyrlarymyz ben bı-sheshenderimizdi tyńdap, sal serilerimizdi qurmettep keldi. Ol zamannyń zıalylary urpaqtar arasynda qazaqqa tán ulttyq belgilerimen qalyp, ǵasyrdan ǵasyrǵa jeteri anyq. Ótken ǵasyrda da halyqtyń baǵdarshamy aqyn jazýshylarymyz bolyp kelgen. Al búgin she? Búgin biz kimge qarap boı túzeımiz? Búgin halyq kimdi tyńdap, kimniń artynan eredi? Shynymen, bul suraqtarǵa kelgende oılanyp qalasyz.
Menińshe, qazirginiń eń bedeldi adamdary batyr da, bı-sheshen de, aqyn-jazýshy da emes. Olar – «juldyz» degen atqa ıe adamdar. Ásirese, búgingi eń dańyqty juldyz – ulttyq tamyrynan ajyraǵan adamdar. Qanshalyqty sol atqa tez jetý úshin eldi tańdandyryp, ózińe uıyta alýyń kerek. Tańdandyr joly ultyńnyń dástúrimen adamdy tárbıeleý maqsatyna emes, jyn oınaqpen azdyryp, esinen tandyryp essizdikke aparý. Halyqtyń esinen aıyrylyp, tamyrynan alshaqtaǵany bılik úshin de tıimdi. Sondyqtan, bizdiń elde solarǵa jol ashyq. Tipti, elimizdiń mádenıet oshaǵy bolyp sanalatyn Almatyda Esimov ákim bolǵan 8 jyldyń ishinde merekelik is sharalarǵa qalanyń sahanasyna birde-bir dástúrli oryndaýshy shyqpaǵan eken. Baýyrjan Báıbektiń kelgenine de 3 aıdyń júzi boldy. Úmit kútip edik, aqtalmady. Qaıta kıeli sahanaǵa Saılaýbek shyǵyp ketti.
Ózge «juldyzdar» týraly aıtyp sózdi kóbeıte bermeıin. Búginiń eń tanymal «juldyzy» osy Saılaýbek bolyp tur. Beımálim ómirden kelgen, beımálim tildegi óleńimen tyńdaýshylarynyń súıiktisne aınalǵan jigit – jankúıerlerine kóptigi jaǵynan Erkin Shúkiman, Ramazan Stamǵazıev sıaqty dástúrli ánniń sańlaqtary men ataqty «Mýzart» ansambli turmaq, búgingi estarda juldyzdary Qaırat Nurtas pen Ernar aıdardy da jolda qaldyrdy.
Keshe sol aty shýly Saılaýbektiń «Qaırat» komandasynyń týyn aıaǵyna taptaǵany týraly sýret áleýmettik jelilerde tarady. Saılaýbekti synaǵan adamdardan kóri onyń bul isin aqtap ony qorǵashtaǵandardyń sany anaǵurlym joǵary boldy. Budan, Saılaýbektiń qoldaýshylarynyń, Saılaýbek «Qaırattyń» emes, qazaqtyń týyn taptasa da qorǵap alýǵa daıyn ekenin kórsetip, bizdi qorqytyp tastady. Qoryqpaı qaıtemiz?, «Qaırattyń týy memlekettik tý emes qoı»,- degen jankúıerlerdiń aptyqqan túrinen, olardyń Saılaýbek úshin nege bolsada barýǵa daıyn túrin kórýge bolady.
Qoǵamda Saılaýbek bireý ǵana emes. Juldyz bolyp júrgen talaı Saılaýbekter bar. Olardyń artynda myńdaǵan, mıllıondaǵan qoldaýshylary bar. Biraq, ózderinde sol qoldashylardy artynan durys erte alatyn aqyl-parasat pen ózindik ustanymy, pikiri, óz oıy joq. Ózge bireýdiń siltegen jolymen júrip, nusqaýyn tyńdap keshegi Saılaýbekshe ot basyp, artynan keshirim surap qutylady. Saılaýbektiń keshegisi shynda jankúıerleri aıtqandaı jáı ǵana nárse shyǵar. Biraq ondaı artynda mıllıondaǵan áskeri bar, óziniń qolbasshylyq qabyleti joq adamdy kim de bolsa óz maqsatyna paılanyp, qarý retinde jumsaıtyny anyq. Osy kezde belgili bir qoǵamdyq is sharalar bolsyn, úkimetke, bılikke halyqtyń qal jáıin men ulttyń taǵdyryn aıtyp shyqqan narazylyq sharalar bolsyn qaı bir qoǵam qaıratkeriniń artynan asyp ketkende 100 adam ǵana eredi. Al, bul juldyzdar shyqsa taý qoparyp tastaýǵa shamalary jetedi.
Juldyzdyń ómiri qyzyqtyrǵan qoǵam úshin juldyzdan qorqynyshty eshkim joq. Eger, tanym men talǵam tarazysy bolmaı, qoldan jasalǵan juldyzdar kóbeıip ketse oıda joqta opyq jeýimiz múmkin. Bul qorqynysh tek bizde ǵana emes, bılikte de bolǵany jón. Óıtkeni, salmaqsyz qańbaq qaı jaqtan jel shyqsa, sol jeldiń baǵytymen domalaı bermek. Jaý ketken soń qylyshymyzdy bylǵap júrmeý úshin osy bastan baq juldyzymyz ben sorymyz bolatyn juldyzdardy ajyratyp alaıyq.
Turdybek Qurmethan
