Atyraý oblystyq máslıhatynyń depýtattary aımaqtaǵy údemeli ındýstrıalyq-ınnovasıalyq damý baǵdarlamasy aıasynda oblystyq búdjet esebinen qarjylandyrylyp, júzege asyp jatqan jobalardy aralap kórdi.
Atyraý oblysynda Indýstrıalandyrý kartasy sheńberinde jalpy quny 1,6 trıllıon teńgeni quraıtyn 44 ınvestısıalyq joba iske asyrylýda. Aımaq úshin ǵana emes, tutas elimiz úshin mańyzdy jobalardyń qazirgideı naryq qyspaǵynda júzege asýy utymdy uıymdastyrý jumystary men naqty sheshimderdi talap etip otyr. Osy turǵyda oblystyń depýtattary ózekti problemanyń aldyn alýda óńirdegi jańa jobalardyń baǵyty men baǵdaryn, keleshegin paıymdaý úshin óndiris oryndaryn aralap kórip, kásipkerlermen ashyq dıalogta boldy.
Aımaq depýtattary jańa jobalardyń búgingi tynysymen tanysýdy aldymen óńir halqyn qus eti men jumyrtqasymen qamtyp otyrǵan «Almaly qustyń» fabrıkasynan bastady.
«Almalyqus» fabrıkasy óńirdiń qus ónimderine degen suranysyn tolyq qanaǵattandyrýǵa múmkindik berýde. Qus fabrıkasy tolyq qýatyna kóshkende jylyna 30 mıllıon jumyrtqa óndiredi. Halyq qalaýlylary atalǵan nysanda bolyp, sehtardyń jumysymen tanysty.
Qus fabrıkasynda Reseıdiń Sverdlovsk oblysynan ákelingen germanıalyq «Haıseks Ýaıt» tuqymdy alty myńnan astam balapan arnaıy kútimge alynǵanyna jetpis kúndeı ýaqyt bolǵan. Endi fabrıka mamandary olardyń toqsan kúnnen keıin alǵashqy ónimin alýǵa daıyndalýda.
Fabrıka dırektory Vıktor Pastyń sózine súıensek, qazirgi tańda munda toqsanǵa jýyq adam qyzmet etýde. Al olardyń ortasha eńbek jalaqysy 55000-60000 teńgeni quraıdy. Fabrıkada 175 myńdaı qus bar. Mamandar qustardan táýligine 90 myń jumyrtqa alyp otyr. Mamandar qus fabrıkasynyń tórtinshi sehy qarasha aıynda iske qosylǵanda balapandar sany 62 myńǵa jetedi dep boljap otyr. Sonyń nátıjesinde, jańa jyl qarsańynda ónim kólemin arttyryp, táýligine 120 myńdaı jumyrtqa óndirilip, tutynýshyǵa jetkiziledi.
Atyraýlyq qus fabrıkasy óńirdiń jumyrtqaǵa suranysymen birge, kórshiles Mańǵystaý oblysyn da jumyrtqamen qamtýdy bir júıege qoıǵan. Mańǵystaýdyń saýda núktelerine kem degende suranys boıynsha 840 qorap jumyrtqa jiberiledi. Aıtarlyǵy, demalys kúnderi qus fabrıkasy óz ónimderin jármeńkelerge shyǵaryp, 13 teńgeden satyp otyr. Joǵarǵy surypty jumyrtqanyń salmaǵy 80-90 gramnan asady. Al orta suryp – 65-75 gram.
Oblys depýtattary qus fabrıkasyn aralap kórýde ónimderdiń sapalyǵyna, qoljetimdi baǵamen satylýyna rıza bolyp, fabrıka ujymyna naryqtyń qyspaǵyna tótep berip, aımaqty qus eti men jumyrtqamen qamtýda tabysqa jetýlerine tilek bildirdi.
Atyraýda et baǵytyndaǵy «broıler» tuqymdy taýyq ósiretin qus fabrıkasy jobasynyń jalpy quny úsh mıllıard jeti júz mıllıon teńgeni quraıdy. Onyń 1 mıllıard 746 mıllıon teńgesi, ıaǵnı 49 paıyzy jergilikti búdjetten «Atyraý» áleýmettik korporasıasy arqyly qarjy qaralyp, sonyń 85 paıyzy ıgerilýde. Qazirgi tańda jylyna 2600 tonna qus etin óndiretin «Meken-Chicken» broıler qus fabrıkasynyń qurylysy júrip jatyr.
«Atyraý» áleýmettik-kásipkerlik korporasıa» ulttyq kompanıasy» AQ basqarmasynyń tóraǵasy Abat Tasymovtyń aıtýynsha, áriptester óz esebinen 350 mıllıon teńgedeı qarjy bólip, qalǵan qarajatty ekinshi deńgeıli bank «Sesnabank» AQ-tan maqsatty nesıe alý arqyly qarastyrylýda. Endi bul másele sheshilse, qarjylandyrý bastalyp, jumysty bastaýǵa múmkindik bolady.
Bul – oblysta azyq-túlik qaýipsizdigin qamtamasyz etý baǵytyndaǵy mańyzdy joba. Onyń naryqtaǵy qıyndyqqa qaramastan júzege asýy oblystyq máslıhat depýtattaryn tolǵandyrýynda da ózindik sebepter bar.
Oblystyq máslıhattyń depýtattyq korpýsy Atyraýda qurylysy júrip jatqan «Lýmpan Kaspıan Farmasútıkals» JSHS farmasevtıkalyq ónim shyǵaratyn zaýytta da boldy.
Zaýyttyń qurylysy «Medısına» AQ, «SAVA Healthcare» kompanıasy, «Atyraý» ÁKK» UK» AQ, «Lifeline Fze» kompanıasy, «ALIM COM» JSHS qatysýymen júrýde. Joba quny 3 mıllıard 700 myń teńgeni quraıdy. Farmasevtıkalyq zaýyt tolyq qýatyna shyǵyp, paıdalanýǵa berilgende, jylyna 800 mıllıon dana dári, 300 mıllıon dana kapsýla, 78 mıllıon dana ampýla men 3 mıllıon býma jaqpa maı, 12 mıllıon quty eritindi daıyndap shyǵarady.
Halyq qalaýlylary budan basqa turǵyn úı kombınaty, kókónisterdi konservileý, shujyq ónimderin shyǵaratyn seh, mal júnin bastapqy óńdeýden ótkizýge arnalǵan zamanaýı úlgidegi jańa keshen jáne basqa da jańa jobalardyń júzege asyrylý barysymen tanysyp, olardyń kókeıkesti máselelerine nazar aýdaryp, oryn alǵan problemalar bolsa sheshý joldaryna yqpal etetindikterin aıtty.
Óńirdegi jobalardyń aıaq alysymen, qurylysynyń júrý barysymen tanysyp shyqqan oblystyq máslıhat depýtattary Atyraý aımaǵyndaǵy irgeli jobalardyń munaıly óńirde iske asýyna Elbasymyz aıryqsha jaǵdaı jasap otyrǵanyn aıtty. Bul jobalardyń qazirgi naryq qyspaǵyna qaramaı, óz qýatty kúshimen tolyq paıdalanýǵa berilýine oblys ákimi Baqtyqoja İzmuhambetov te erekshe nazar aýdaryp otyr.
Derekkóz: Aıqyn-aqparat
