«Astana Opera» teatry ekinshi «Jibek joly» ha­lyq­aralyq fes­tıvali aıasynda álemdik deńgeıdegi tulǵalardy qarsy alý dástúrin jalǵastyrýda. Bul joly bekzat ónerdiń jankúıerlerine Djýlıo Boskettı (Italıa) men Nájmıddın Máýlenovtiń (Ózbekstan) ónerin tamashalaýǵa múmkindik týǵyzylyp otyr. Dj. Pýchchınıdiń «Toska» operasynda olar negizgi partıalardy oryndamaq. Al basty róldi Qazaqstannyń eńbek sińir­gen qaıratkeri Margarıta Dvoreskaıa somdaıdy.
Eń aıtýly óner oshaqtary repertýarynan berik oryn alǵan «Toska» operasynyń qoıýshy rejıs­seri – Lýka Ronkonı desek, dırıjerlik tizginde – Qazaq­stannyń eńbek sińirgen qaıratkeri Abzal Muhıtdınov.
Pýchchını sújet úshin óte kúr­deli ári ánshi Florıa Toska men sýretshi Marıo Kavaradossı (Nájmıddın Máýlenov) ara­syndaǵy qaıǵyly jaǵdaıda aıaq­talatyn mahabbat týraly asa mánerli shyǵarma jazdy. Ope­radaǵy kórinis pen basty oqıǵa 1800 jyldar tusyndaǵy zulmatty dáýirde Napoleon áskeri Italıany basyp alyp, respýblıka qurǵan kezde órbıdi… Qos ǵashyq ozbyr­lyq, azap, abaqty men ólim qur­banyna aınalady… Saıası kúre­s­­­ten alys bolǵan jandar, eriksiz onyń tyrnaǵyna iligedi. Sol kezeńder kartınasy áserli dekorasıalar arqyly erekshe jetkiziledi.
Ózbekstandyq Nájmıddın Máýlenovtiń ónerine kelsek, ol – bul salada óte bıik shyńdardy baǵyndyryp úlgergen, tabynýshylaryn opera óneriniń ıirimine úıire alǵan, erte jasynan joǵary ataqqa ıe bolǵan tanymal ánshi. Kavaradossıdiń partıasyn alǵash ret 2013 jyly Antverpen, Gent jáne Máskeý qalalarynda bir mezgilde qatar shyrqaýy onyń shyǵarmashylyǵyna úlken jetistik alyp keldi.
– Keıipkerimdi óte jaqsy seze­min, biz, tipti, bir-biri­miz­ben ishteı túısik arqyly túsi­nise­miz, uqsas jaǵymyz kóp. Men kezinde alfreındik jumyspen – qabyrǵaǵa gúl men oıýdan sýret salýmen aınalysqanmyn. Mi­ne, ony janyma jaqyn tutatyn sebebim. Soǵan oraı birinshi alǵan bilimim – ganchti (gıpsti) kesýshi. Endeshe, sýretshi mamandyǵy maǵan eshqandaı da jat emes, – dedi óz suhbatynda.
Onyń sahnadaǵy áriptesi ıta­lıalyq Djýlıo Boskettı týraly aıtatyn bolsaq, ol búgingi tańda Eýropanyń eń bedeldi teatrlary men konserttik zaldarynda óner kórsetedi. Sheteldik barıton «Astana Opera» memlekettik opera jáne balet teatrynyń tórinde alǵash ret óner kórsetpek, osy oraıda ánshi Qazaqstanǵa sapary arqyly shyǵarmashylyq jaǵynan kóp tájirıbe jınaqtap qaıtýdan asa úmitti. Onyń aıtýynsha, bul sabaqtastyq, sondaı-aq, qos tarap úshin de óte tıimdi mádenı baılanys bolmaq.
– Astanalyq tyńdarmandy esten ketpes áserlerge bólegim keledi. Sol úshin «Toskamen» ju­mys barysynda mundaǵy áriptes­terimmen birge ortaq múdde úshin barynsha kúsh salýǵa tyrysamyn. Zaldyń kórermenge lyqa tolaryna aldyn-ala senimdimin. Nege deseńiz «Toska» – bul emosıaǵa toly, keremet sezim syılaıtyn qoıylym desek, al ony tamasha­laý adamdy sheksiz shattyqqa keneltedi. Jurtty bir kúngi sharýasyn jıyp qoıyp, tek osymen áserlenýge shaqyramyn, – dedi maestro. Sonymen qatar, ánshi áńgime barysynda Rıgolettodan keıingi eń súıikti róli Skarpıa ekenin atap ótti.
– Bul – óte-móte kúrdeli keıip­ker, – dedi. – Alaıda, jalpy ope­radaǵy eń qyzyqty beıne barlyq jerde osy bolyp qala bererine sene­min. Kezinde Pýchchınıdiń ózi bul týyndyny qalaı ataýyn bil­megen, tipti, onyń «Toska» ataýyna birazǵa deıin senimsiz bolǵan kórinedi, sebebi, atalǵan beı­neniń – zulym kemeńgerdiń mańyzy aıryqsha edi. Sondyqtan mundaı rólderdi oryndaǵan kezde, árıne, keıipkerdiń minezin somdap jetkizý óte mańyzdy dep esepteımin. Jazýshy Genrı Mıl­ler aıtqandaı: «Óner ómirdiń mánin túsinýden basqa eshnársege úıret­peıdi», men-daǵy tek osy aı­tylǵan keremet sózge sheksiz ılan­ǵan kúıimnen ózgermeımin.

Derekkóz:egemen Qazaqstan