Búgin - qazaq poezıasynyń aqıyq aqyny Muqaǵalı Maqataevtyń týǵan kúni. Jıyrmasynshy ǵasyrdyń ozyq aqyndarynyń biri bolǵan Muqaǵalı týǵan halqyna óshpes mura, sarqylmas qazyna qaldyrdy.

«Búgin meniń týǵan kúnim, oı, páli-aı!» dep jyrlaǵan aqyn 1931 jyly Almaty oblysynyń Narynqol aýdanyndaǵy Shalkóde aýylynda týǵan.

Muqaǵalıdyń aýyldan bastalǵan eńbek joly, Almatyda jalǵasady.  Bastapqyda jetijyldyq mekteptiń muǵalimi bolady. Sodan Narynqol aýdandyq «Sovettik shekara» gazetinde isteıdi. Ár jyldary «Sosıalısik Qazaqstan» (qazirgi «Egemen Qazaqstan») gazetinde (1962-1963), «Mádenıet jáne turmys» (qazirgi «Parasat») 1963-1965, «Juldyz» (1965-1972) jurnaldarynyń redaksıasynda, Qazaqstan Jazýshylar odaǵynda (1972-1973) qyzmet atqardy.

Aqynnyń «Ilıch», «Armysyńdar dostar», «Qarlyǵashym, keldiń be?», «Mavr», «Aqqýlar uıyqtaǵanda», «Shýaǵym meniń», «Ómirdastan» atty jyr jınaqtary kóziniń tirisinde jarıalanǵan. Dúnıeden ozǵan soń da, aqynnyń «Soǵady júrek» jáne basqa kóptegen kitaptary jaryq kórdi.

Aqyn Farıza Ońǵarsynovanyń aıtýynsha, «Qarlyǵashym, keldiń be?» jyr jınaǵy shyqqannan bastap Muqaǵalı halyqtyń júreginen oryn aldy. «Men Muqaǵalıdy tól ádebıetimizdegi Abaı, Mahambet sıaqty uly tulǵalardyń qatarynan kóremin. Onyń asqaq poezıasynan ultymyzdyń barlyq bolmys-bitimin, arman-muratyn aıqyn baıqaımyz», - deıdi aqyn Farıza.

Muqaǵalı 1976 jyly qaıtys boldy, Almaty qalasyndaǵy Keńsaı zıratyna jerlengen.

Qara óleńdi qadir tutatyn halqy barda, aqynnyń adýyndy da syrshyl poezıasy máńgi jasaı beretini anyq.