الماتىدا «CFO Idea Exchange & Networking Event» ءسامميتى ءوتتى. جيىن بارىسىندا ق ر ۇلتتىق بانكىن ءار كەزدەرى باسقارعان ەكس-توراعالار وزدەرىنىڭ باسقارعان جىلدارىنداعى جىبەرگەن قاتەلىكتەرى تۋرالى ايتتى، - دەپ حابارلايدى «قامشى» پورتالى قازاقپاراتقا سىلتەمە جاساپ.

قايرات كەلىمبەتوۆ ءسات سايىن وزگەرىپ جاتقان كوممۋنيكاتيۆتىك تەحنولوگيالارعا ىلەسە الماعانىن ايتتى.

«مەنىڭ باسقارۋىم كەزىندەگى قاتەلىگىم  بۇدان دا جەتىلدىرىلگەن كوممۋنيكاتيۆتىك ستراتەگياعا بەت بۇرۋ كەرەك ەدى. ءقازىر الەمدە ءتۇرلى قاتەرلەرگە جاۋاپ بەرەتىن كوپ الەۋمەتتىك تەحنولوگيالار بار. مەملەكەتتىك قۇرىلىم حالىقپەن ۇزاق مەرزىمدى ۋاقىتتا بايلانىس ورناتۋى كەرەك ەدى»، - دەدى ق.كەلىمبەتوۆ.

سونداي-اق، ول ۇلتتىق بانكتىڭ جەتكەن جەتىستىكتەرى تۋرالى دا تىلگە تيەك ەتتى. ونىڭ ايتۋىنشا، بەلگىلەنگەن كۋرستان ينفلياسيالىق تارگەتتەندىرۋگە كوشۋ ۇلكەن جەتىستىك.

«الەمدە بۇل وتە اۋىر ءارى ۇزاق وتەدى. مىسالى، چيلي مەملەكەتىنە وعان كوشۋ ءۇشىن 5-7 جىل كەرەك بولدى. ال، بىزدە ول جىلدام ءارى ءسال جەڭىلىرەك ءوتتى. كەمشىلىكتەرگە كەلەر بولساق، 2004-2007 جىلدارى نەسيە داعدارىسى ۇلتتىق بانك جىبەرگەن ۇلكەن قاتەلىك بولدى. سول كەزدە بانكتەر كوپ مولشەردە نەسيە بەرىپ، قۇرىلىس سالىپ، ناشار كرەديت پورتفەلى 30 پروسەنتكە دەيىن جەتتى. 40 ملن دوللار قارىز پايدا بولدى. بۇل ۇلكەن قاتەلىك ەدى. قازاقستان ءالى سونىڭ زاردابىن تارتىپ كەلەدى»، - دەدى ق.كەلىمبەتوۆ.

باس بانكتى 1998-1999 جىلدارى باسقارعان قادىرجان داميتوۆ بولسا، ۇلتتىق بانكتىڭ جەتىستىگى رەتىندە جۇزەگە اسقان جاقسى رەفورمالار مەن باستامالاردى ايتتى.

ءبىراق، بانك جۇيەسىن رەفورمالاۋ كەزىندە ءسال راديكالدى شارالاردى قولعا الا الماعانىنا وكىندى.

2004-2009 جىلدارى ۇلتتىق بانكتىڭ ءتوراعاسى بولعان ءانۋار سايدەنوۆ ۇلتتىق بانكتىڭ جۇمىسىنداعى جەتىستىك رەتىندە نورماتيۆتىك بازانىڭ قالىپتاسۋىن، بانك جۇيەسىنىڭ حالقارالىق جۇيەگە ەنۋىن، ۇزدىك تەحنولوگيالار يمپورتىن اتاپ ءوتتى.

«ءبىراق، حالىقارالىق تاجىريبەنى ەنگىزە وتىرىپ، ءبىز ونى سوڭىنا دەيىن جەتكىزبەدىك. بانكتەر ۇزدىك كورپوراتيۆتىك باسقارۋ تەتىكتەرىن ەنگىزبەدى، تاۋەكەلدەردى باعالاۋ جۇيەسى ءالسىز بولدى»، - دەدى ول.

قارجىلىق سەكتورداعى قازاقستاننىڭ جەتىستىگى رەتىندە وراز جاندوسوۆ بانك جۇيەسىنىڭ مەملەكەتتەن جەكەمەنشىك تۇرىنە كوشۋىن اتادى.

«ۇلتتىق قوردى جاساعان كەزدە مۇناي سالىعىنىڭ قۇبىلمالىلىعىن جويۋدى قاراستىرمادىق. ەركىن باعامعا جىبەرىلگەننىڭ وزىندە ونى الدىن الا بولجاۋ مۇمكىن ەمەس. مەنىڭ ۇسىنىسىم، مۇنايدان تۇسەتىن سالىقتىڭ بيۋدجەت تولىقتىراتىن ۇلەسىن ۇمىتۋ كەرەك»، - دەدى و.جاندوسوۆ.

ساراپشى ءوزىنىڭ ۇكىمەتكە دەر كەزىندە اۋىسپاعانىنا وكىنەتىنىن جەتكىزدى. ونىڭ ايتۋىنشا، ول جاعدايدا ءبىرقاتار ادىلەتسىز جەكەشەلەندىرۋدىڭ الدىن الۋعا بولار ەدى.