قازاقستان ۇكىمەتى ەلدەگى ءبىرىڭعاي ۋاقىت بەلدەۋىنە قاتىستى زەرتتەۋدىڭ قورىتىندىسىن جاريالادى.

جۇمىس بارىسىندا دەرەكتەردى زەرتتەۋ، ساۋالناما ناتيجەلەرى جانە ءبىرىڭعاي ۋاقىت بەلدەۋىنە اۋىسقانعا دەيىنگى جانە كەيىنگى كورسەتكىشتەردى سالىستىرۋدى قامتيتىن كەشەندى ءتاسىل قولدانىلدى. زەرتتەۋ جۇرگىزۋ ادىستەمەسى ءبىرىڭعاي ۋاقىت بەلدەۋىن ەنگىزۋدىڭ حالىق دەنساۋلىعىنا، ەنەرگيا تۇتىنۋعا، ەڭبەك تيىمدىلىگىنە، وقۋشىلاردىڭ ۇلگەرىمىنە، جول-كولىك وقيعالارى دەڭگەيىنە، قىلمىسقا جانە باسقا دا اسپەكتىلەرگە اسەرىن باعالاۋ بويىنشا 40-تان استام مەتريكا مەن كورسەتكىشتەردى قامتيدى. 

"دەنساۋلىق ساقتاۋ سالاسى بويىنشا 100 مىڭ ادامعا ەسەپتەلگەن قالا جانە اۋىل تۇرعىندارىمەن قاتار ءتۇرلى جاستاعى ازاماتتار قامتىلدى. ەنەرگيا تۇتىنۋ بويىنشا ەلەكتر ەنەرگياسىن تۇتىنۋ ستاتيستيكاسىن، ونىڭ ىشىندە ەڭ جوعارى جۇكتەمەلەردى جانە بۇكىل ەل بويىنشا ەلەكتر ەنەرگياسىن تۇتىنۋعا سالىستىرۋ جۇرگىزىلدى. ەڭبەك قىزمەتى بويىنشا، ورىندالعان جۇمىس كولەمى، كەشىگۋ جانە ساباققا كەلمەۋ جاعدايلارى، جاراقاتتار مەن ءتارتىپ بۇزۋ جاعدايلارى قامتىلعان"، – دەدى ساۋدا جانە ينتەگراسيا ءمينيسترى ارمان شاققالييەۆ. 

ونىڭ سوزىنشە، زەرتتەۋ قورىتىندىسى ۋاقىت بەلدەۋىنىڭ اۋىسۋى تۇرعىنداردىڭ ومىرىنە كەرى اسەر ەتپەگەنىن كورسەتكەن. 

"مەملەكەت باسشىسى ۇكىمەت پەن پارلامەنتكە اتالعان ماسەلەنى ەگجەي-تەگجەيلى قاراپ، بىرلەسىپ وڭتايلى شەشىم قابىلداۋدى تاپسىرعانىن بىلەسىزدەر. ءمينيستردىڭ بايانداماسىندا ايتىلعانداي، مونيتورينگ ءبىرىڭعاي ۋاقىت بەلدەۋىن ەنگىزۋ تۋرالى قابىلدانعان شەشىمنىڭ تەرىس اسەرى جوق ەكەنىن كورسەتتى"، – دەپ قوستى پرەمەر-مينيستر ولجاس بەكتەنوۆ.