پرەمەر-مينيستر ولجاس بەكتەنوۆتىڭ توراعالىعىمەن سۋ تاسقىنىنا قارسى شارالاردى ۇيلەستىرۋ جانە قارعىن سۋ ءجۇرۋ كەزەڭىنىڭ سالدارىن جويۋ جونىندەگى رەسپۋبليكالىق شتابتىڭ وتىرىسى ءوتتى.
ەكولوگيا جانە تابيعي رەسۋرستار ءمينيسترى ەرلان نىسانبايەۆ وڭىرلەردەگى گيدرومەتەورولوگيالىق جاعداي تۋرالى باياندادى.
"Tasqyn" جۇيەسىندەگى سۋ تاسقىنى جاعدايىن مودەلدەۋ ناتيجەلەرىن سيفرلىق دامۋ ءمينيسترى جاسلان مادييەۆ، سۋ نىساندارىنىڭ جاعدايى تۋرالى سۋ ءمينيسترى نۇرجان نۇرجىگىتوۆ، سۋ تاسقىنىنا قارسى ارەكەت ەتۋ تۋرالى توتەنشە جاعدايلار ءمينيسترى شىڭعىس ءارىنوۆ بايانداما جاسادى.
اقمولا، قوستاناي، اقتوبە، باتىس قازاقستان، اتىراۋ وبلىستارىنىڭ اكىمدەرى سۋ باسۋدىڭ الدىن الۋ بويىنشا قانداي شارالار اتقارىلىپ جاتقانىن باياندادى.
13 ناۋرىزداعى جاعداي بويىنشا ەلىمىزدىڭ قار باسىپ جاتقان اۋماعى – 67%. ەكولوگيا جانە تابيعي رەسۋرستار ءمينيسترى ەرلان نىسانبايەۆ قىزىلوردا، تۇركىستان، جامبىل، باتىس قازاقستان، اتىراۋ جانە ماڭعىستاۋ وبلىستارىندا قار ەري باستاعانىن ايتتى. ەلىمىزدىڭ سولتۇستىك-باتىسىندا، سولتۇستىك-شىعىسىندا جانە ورتالىعىندا توڭنىڭ قالىڭ بولۋى بايقالىپ وتىر.
“قوستاناي وبلىسىندا 150 سم-گە دەيىن جانە ودان دا كوپ، اقمولا وبلىسىندا 139 سم-گە دەيىن، پاۆلودار وبلىسىندا – 159 سم-گە دەيىن، قاراعاندى وبلىسىندا –132 سم-گە دەيىن توڭ بار. ناۋرىز جانە ءساۋىر ايلارى جىلى بولادى دەگەن بولجام بار، ەلىمىزدىڭ باسىم بولىگىندە جاۋىن-شاشىن مول بولادى، بۇل سۋ تاسقىنى ءقاۋپىن ارتتىرادى”، – دەلىنگەن حابارلامادا.
"قازگيدرومەت" بيىل ءاربىر ءوڭىر بويىنشا سۋ شىعىنىنىڭ ەڭ جوعارى دەڭگەيىن، گيدرولوگيالىق بەكەتتەر بويىنشا اعىن كولەمىن كورسەتەتىن جانە ءقاۋىپتى ايماقتاعى ەلدى مەكەندەردى انىقتادى.
تاسقىن ءقاۋپى جوعارى ايماقتار:
- شىعىس قازاقستان،
- قاراعاندى،
- اقمولا،
- سولتۇستىك قازاقستان،
- قوستاناي،
- اقتوبە،
- اباي،
- ۇلىتاۋ وبلىستارى
ءقاۋىپ دەڭگەيى ورتاشا ايماقتار – الماتى، جەتىسۋ، جامبىل، باتىس قازاقستان جانە اتىراۋ وبلىستارى.
سۋ باسۋ ءقاۋپىن ازايتۋ ماقساتىندا پرەمەر-مينيستر ۋاكىلەتتى ورگاندارعا اقمولا، باتىس قازاقستان، ۇلىتاۋ، قاراعاندى جانە سولتۇستىك قازاقستان وبلىستارىن ارالاپ، شۇعىل شارالار قابىلداۋ جونىندە تاپسىرمالار بەردى.
پىكىر قالدىرۋ