ەكولوگيا جانە تابيعي رەسۋرستار ءمينيسترى ەرلان نىسانبايەۆ سۋ تاسقىنى بولۋى مۇمكىن ايماقتاردى اتادى. 

مينيستر ءناۋرىز-ساۋىر ايلارىندا كۇن رايى جىلى بولاتىنىن اتاپ ءوتتى. سونىمەن بىرگە ەلىمىزدىڭ باسىم بولىگىندە جاۋىن-شاشىن كوپ تۇسەتىنىن ايتادى.

سۋ تاسقىنى ءقاۋپى جوعارى وڭىرلەردىڭ قاتارىندا: اقتوبە، قوستاناي، قاراعاندى، اقمولا، سولتۇستىك قازاقستان، شىعىس قازاقستان وبلىستارى جانە ۇلىتاۋ جانە اباي وبلىستارى بار. قاۋىپتىلىگى ورتاشا وڭىرلەر: الماتى، جەتىسۋ، جامبىل، باتىس قازاقستان جانە اتىراۋ وبلىستارى.

تاسقىن ءقاۋپى تومەن وڭىرلەر: پاۆلودار، ماڭعىستاۋ، تۇركىستان جانە قىزىلوردا وبلىستارى.

بيىل قازگيدرومەت العاش رەت ءار وبلىس بويىنشا ەگجەي-تەگجەيلى انىقتامالار دايىندادى. بۇل انىقتامالاردا گيدرولوگيالىق بەكەتتەر بويىنشا سۋ دەڭگەيىنىڭ جانە اعىسىنىڭ كۇتىلەتىن ەڭ جوعارى ماندەرى، اعىن كولەمى جانە سونداي-اق ءقاۋىپ ايماعىندا ورنالاسقان ەلدى مەكەندەردى كورسەتە وتىرىپ، بولجامدى باستالۋ كۇندەرى كورسەتىلەدى. سونداي-اق وتكەن اپتادان باستاپ قازگيدرومەت اپتا سايىنعى گيدرولوگيالىق بولجامداردى شىعارا باستادى. گيدرومەتەورولوگيالىق جاعداي كۇرت وزگەرەتىن بولسا "قازگيدرومەت" ەسكەرتۋلەردى 2-3 تاۋلىك بۇرىن حابارلايدى، - دەيدى ەرلان نىسانبايەۆ ۇكىمەت وتىرىسىندا.