الماتىدا كۇندىز، قوستانايدا تۇندە اۋا ساپاسىن ناشارلاتاتىن قولايسىز مەتەوجاعداي كۇتىلەدى. تىنىسىڭىزعا اۋىر تيەتىن ءتۇتىن مەن تۇمان جينالۋ ءقاۋپىن سينوپتيكتەر ەسكەرتتى.

الماتى مەن قوستاناي تۇرعىندارىنا «قازگيدرومەت» رەسمي ەسكەرتۋ جاسادى.

نە بولىپ جاتىر؟

«14 قاڭتاردا الماتىدا، تۇندە قوستانايدا قولايسىز مەتەوجاعداي كۇتىلەدى» دەپ ۆەدومستۆو حابارلادى.

مۇنداي جاعدايدى ماماندار جەلدىڭ تىيىلۋى، ءالسىز جەل، تۇمان جانە ينۆەرسيا سەكىلدى قىسقا مەرزىمدى فاكتورلارمەن تۇسىندىرەدى. وسىنداي قۇبىلىستار زياندى بولشەكتەردى جەرگە جاقىن قاباتتا ۇستاپ قالىپ، شاڭ مەن ءتۇتىننىڭ تارالۋىن تەجەيدى.

الماتىداعى بولجام

سارسەنبى كۇنى الماتىدا اۋىسپالى بۇلتتى اۋا رايى كۇتىلەدى، جاۋىن-شاشىن تۇسپەيدى. تۇندە جانە تاڭەرتەڭ تۇمان ءتۇسۋى مۇمكىن. تەمپەراتۋرا تۇندە −0…−2°س، كۇندىز +3…+5°س بولادى.

قوستانايداعى جاعداي

قوستانايدا از بۇلتتى، جاۋىن-شاشىنسىز اۋا رايى ساقتالادى. اياز كۇشەيەدى: تۇندە −27…−29°س، كۇندىز −23…−25°س بولادى.

ءقاۋىپ كىمگە جوعارى جانە نە ىستەۋ كەرەك؟

ءتۇتىن مەن ۇساق بولشەكتەرگە سەزىمتال توپتارعا (بالالار، جۇكتى ايەلدەر، جۇرەك-قان تامىر جانە تىنىس الۋ اۋرۋلارى بار جاندار، قارتتار) ساقتىقتى كۇشەيتۋ ۇسىنىلادى. ءۇي-جايلاردى ءجيى جەلدەتۋدى، كوشەدە ۇزاق جۇكتەمەدەن (جۇگىرۋ، تەز ءجۇرۋ) باس تارتۋدى، قاجەت بولسا، سۇزگىسى بار ماسكا قولدانۋدى دارىگەرلەر ۇسىنادى. قوعامدىق كولىكتى كوبىرەك پايدالانۋ ارقىلى كولىك قوزعالىسىن ازايتۋعا قالا تۇرعىندارى ۇلەس قوسا الادى.

«قازگيدرومەت» بۇعان قوسا ەلدىڭ بىرنەشە وڭىرىندە تۇنگى جانە تاڭعى ۋاقىتتا تۇمان، بوران جانە اياز كۇشەيەتىنىن ەسكەرتتى.

بۇل تۋرالى Qamshy.kz اقپارات اگەنتتىگى حابارلايدى.