ەكولوگيا جانە تابيعي رەسۋرستار ءمينيسترى ەرلان نىسانبايەۆ كيىكتەردى كورشى ەلدەرگە كوشىرۋدىڭ ىقتيمال جولدارى تۋرالى ايتىپ بەردى. ونىڭ ايتۋىنشا، جانۋارلاردى كوشىرۋدىڭ ءتۇرلى تاسىلدەرى بار جانە بۇل ماسەلە عىلىمي تۇرعىدان مۇقيات قاراستىرۋدى تالاپ ەتەدى.
– كيىكتەردى كوشىرۋ – كۇردەلى پروسەسس. National Geographic سياقتى ۇيىمدار جانۋارلاردى ولاردىڭ تاريحي مەكەندەرىنە قايتا ورنالاستىرۋ تۋرالى جوبالاردى ءجيى كورسەتەدى. ادەتتە ءىرى جانۋارلار ارنايى كونتەينەرلەر ارقىلى تاسىمالدانادى. ال كيىك ۇساق تۇياقتى جانۋارلارعا جاتادى، سوندىقتان ونى كوشىرۋدىڭ وزىندىك ەرەكشەلىكتەرى بار. ءقازىر عالىمدارمەن بىرلەسىپ وسى باعىتتا جۇمىس ىستەپ جاتىرمىز. ازىرگە ناقتى ۇسىنىستار ازىرلەنگەن جوق. ارينە، كيىكتى جاي عانا ايداپ اپارا المايمىز – ونى كولىكپەن تاسىمالداۋ كەرەك. بۇل رەتتە جانۋاردىڭ دەنساۋلىعىنا زيان كەلتىرمەي، امان-ەسەن جەتكىزۋ باستى نازاردا بولادى. كولىكپەن جەتكىزۋدىڭ دە بىرنەشە ءتاسىلى قاراستىرىلىپ جاتىر، – دەدى مينيستر ۇكىمەت وتىرىسىنان كەيىن وتكەن بريفينگتە.
ايتا كەتەيىك، بۇعان دەيىن قازاقستان پرەزيدەنتى قاسىم-جومارت توقايەۆ قىتايعا 1،5 مىڭ كيىك بەرۋ جوسپارى بار ەكەنىن مالىمدەگەن بولاتىن.
